2BiC-News

ខេត្តកណ្តាល ៖ យុវជន២នាក់ បានស្លាប់ភ្លាមៗនៅ នឹងកន្លែង បន្ទាប់ពីពួកគេជិះម៉ូតូ មួយគ្រឿងប្រដេញគ្នា ជាមួយម៉ូតូ មិត្តភក្តិរបស់គេមួយគ្រឿងទៀត ហើយចៃដន្យបាន ប៉ះដៃចង្កូតគ្នា បណ្តាលឱ្យទាក់រេទៅបុកដើម អំពិលបារាំងមួយដើម នៅលើចិញ្ចើមផ្លូវពេញទំហឹង ដោយឡែកមិត្តភក្តិរបស់ ពួកគេមិនបានដួលនោះទេ បន្ទាប់មកបានទុកម៉ូតូចោល រួចរត់គេចខ្លួនបាត់ស្រមោល ។

ឧប្បត្តិហេតុគ្រោះថ្នាក់ ចរាចរណ៍នេះបានកើតឡើងកាលពីវេលាម៉ោង៩និង៣០នាទីយប់ថ្ងៃទី៥ មីនា ២០១៣  នៅលើកំណាត់ផ្លូវជាតិលេខ៤ ត្រង់ចំណុចខាងកើត ផ្សារបែកចាន ស្ថិតក្នុងភូមិបែកចាន ឃុំបែកចាន ស្រុកអង្គស្នួល ។  យុវជនរងគ្រោះទាំង២នាក់នោះ ត្រូវបានគេស្គាល់ម្នាក់ឈ្មោះផល ចិត្ត្រា អាយុ១៨ឆ្នាំ និងម្នាក់ទៀតឈ្មោះកុយ  សារ៉ាក់ អាយុ១៨ឆ្នាំ អ្នកទាំង២នាក់ មានទីលំនៅភូមិជាមួយគ្នាក្នុងភូមិថ្មី  ឃុំបែកចាន ស្រុកអង្គស្នួល ។ ពួកគេជិះម៉ូតូមួយគ្រឿងម៉ាកស្មាស់ ពណ៌ខ្មៅ  ចំណែកមិត្តភក្តិរបស់គេម្នាក់ឈ្មោះចន លក្ខិណា អាយុ១៨ឆ្នាំ  មានទីលំនៅភូមិមនោរម្យ ឃុំបែកចាន និងម្នាក់ទៀតឈ្មោះអៀង អាយុ១៨ឆ្នាំ  មានទីលំនៅភូមិថ្មី ឃុំបែកចាន ពួកគេទាំង២នាក់ជិះ ម៉ូតូមួយគ្រឿងម៉ាកស្មាស់វី ពណ៌ខ្មៅ អត់ស្លាកលេខ ៕