ខេត្តស្ទឹងត្រែង៖ បុរសម្នាក់និងស្ត្រីពីរនាក់បានរងរបួសធ្ងន់ ចំណែកបុរសម្នាក់ទៀតបានបាត់បង់ជីវិត ខណៈ កំពុងធ្វើដំណើរតាមផ្លូវ គ្រាដែលជនរងគ្រោះទាំងបីនាក់ត្រូវបានគេដឹកតាមរថយន្តបញ្ជូនមកសង្គ្រោះបន្ទាន់ នៅឯមន្ទីរពេទ្យបង្អែកខេត្តស្ទឹងត្រែង បន្ទាប់បានជួបឧបទ្ទវហេតុគ្រោះថ្នាក់ចរាចរមួយកើតឡើងពីការជិះម៉ូតូជែង (វ៉ា)គ្នាមិនផុត ហើយម៉ូតូនិងម៉ូតូបានប៉ះគ្នារួចបោកដួលទៅលើទ្រូងផ្លូវជាតិ ។
ហេតុការគ្រោះថ្នាក់ចរាចរបណ្តាលឲ្យមនុស្សពីរនាក់របួសធ្ងន់ និងម្នាក់ទៀតបាត់បង់ជីវិតខាងលើនេះ ត្រូវបាន គេរាយការណ៍ថា កើតឡើងនាវេលាម៉ោងប្រមាណជា៥ល្ងាច ថ្ងៃសៅរ៏ ទី២៣ ខែមីនា ឆ្នាំ២០១៣ នៅលើដង ផ្លូវជាតិលេខ៧A ត្រង់ចំណុចគីឡូម៉ែត្រលេខ៣២ ក្នុងសង្កាត់សាមគ្គី ក្រុងស្ទឹងត្រែង ។
ជនរងគ្រោះទាំងបីនាក់ត្រូវបានគេរាយការណ៍ឲ្យដឹងថា ១-ឈ្មោះសុខ គិន ភេទប្រុស អាយុ ៤៧ឆ្នាំ មានទីលំនៅស្រុកពារាំង ខេត្តព្រៃវែង បានស្លាប់នៅតាមផ្លូវពេលបញ្ជូនមកកាន់មន្ទីរពេទ្យ, ២-ឈ្មោះគិន ប៉ុក ភេទស្រី អាយុ៤៧ឆ្នាំ មានទីលំនៅភូមិជ្រៃទ្រាំង ឃុំជ្រៃទ្រាំង ស្រុកពារាំង ខេត្តព្រៃវែង របួសបាក់ដៃស្តាំ ជនរង គ្រោះទាំងពីរនាក់ត្រូវជាប្តីប្រពន្ធនឹងគ្នា ជិះម៉ូតូវ៉េវ S ពណ៌ខ្មៅ ក្នុងទិសដៅពីត្បូងទៅជើង បច្ចុប្បន្នរស់នៅក្នុងទី រួមស្រុកសៀមប៉ាង និង៣-ឈ្មោះសំ អឿន ភេទប្រុស អាយុ២៩ឆ្នាំ មានទីលំនៅភូមិអូរស្វាយ ឃុំអូរស្វាយ ស្រុកថាឡាបរិវ៉ាត់ ខេត្តស្ទឹងត្រែង ជិះម៉ូតូម៉ាកស្មាស់ ពណ៌ទឹកប្រាក់ ម្នាក់ឯងក្នុងទិសដៅស្របគ្នា ។
សេចក្តីរាយការណ៍ដដែលបានបន្តទៀតថា មូលហេតុដែលផ្តើមឲ្យមានករណីនេះកើតឡើង គឺដោយសារ ជនរងគ្រោះទាំងបីនាក់បានជិះម៉ូតូជែងគ្នាមិនផុត រួចម៉ូតូនិងម៉ូតួបានប៉ះដៃចង្កូតគ្នា ហើយក៏បោកទៅលើទ្រូវផ្លូវ បណ្តាលឲ្យម៉ូតូទាំងពីរគ្រឿងរងការខូចខាតស្ទើរទាំងស្រុង ចំណែកមនុស្សបានរងរបួសយ៉ាងដំណំ ។
នៅក្រោយហេតុការណ៍ ជនរងគ្រោះទាំង៣នាក់ ត្រូវបានគេបញ្ជូនតាមរថយន្តសង្គ្រោះរបស់អង្គភាពទីបញ្ជាការ កងរាជអាវុធហត្ថខេត្ត មកកាន់មន្ទីរពេទ្យបង្អែកខេត្តស្ទឹងត្រែង ហើយដោយសាររបួសធ្ងន់ធ្ងរពេក បុរសម្នាក់ជិះ ម៉ូតូឌុបគ្នាជាមួយភរិយាក៏បានបាត់បង់ជីវិតនៅលើរថយន្តនៅគ្រាដែលកំពុងធ្វើដំណើរតាមផ្លូវតែម្ដង ។
បុរសម្នាក់ដែលបានបាត់បង់ជីវិតត្រូវបានគេបញ្ជូនទៅកាន់ទីរស់នៅ រៀបចំធ្វើបុណ្យទៅតាមប្រពៃណី ។ ចំណែកជនរងគ្រោះនៅបន្តសម្រាកព្យាបាលរបួស នៅក្នុងមន្ទីរពេទ្យបង្អែកខេត្តស្ទឹងត្រែង៕
.jpg)
Categories:
ព័តមានជាតិ