រថយន្តទំនើបៗជាច្រើនគ្រឿង មកពីក្រុមហ៊ុនផលិតរថយន្តផ្សេងៗគ្នា បានឈរបង្អួតរាងយ៉ាងសង្ហារនៅក្នុងឱកាសតាំងពិព័រណ៍រថយន្តខ្នាតអន្តរជាតិ Phnom Penh International Motor Show លើកដំបូងក្នុងប្រទេសកម្ពុជា ព្រឹកមិញនេះ។
ការតាំងពិព័រណ៍នេះ រៀបចំឡើងដោយក្រសួងពាណិជ្ជកម្ម សហការជាមួយសមាគមឧស្សាហកម្មយានយន្តកម្ពុជា(Cambodia Automotive Industry Federation ឬ CAIF) និងក្រុមហ៊ុនឯកជននានា។
លោក Rami Sharaf ប្រធានសមាគមឧស្សាហកម្មយានយន្តកម្ពុជាបានថ្លែងថា ការតាំងពិព័រណ៍រថយន្តនេះ ជាការបង្ហាញពីការវិឌ្ឍរីកចម្រើនផ្នែកឧស្សាហកម្មរថយន្តនៅក្នុងប្រទេសកម្ពុជា។ លោករំពឹងថា ពិព័រណ៍នេះនឹងអាចទាក់ទាញអ្នកវិនិយោគជាច្រើនបន្ថែមទៀត ងាកមកចាប់អារម្មណ៍ការអភិវឌ្ឍផ្នែករថយន្តនៅប្រទេសកម្ពុជានៅពេលខាងមុខ។ លោកបន្ថែមថា កម្ពុជានឹងរៀបចំពិព័រណ៍រថយន្តខ្នាតអន្តរជាតិដ៏ធំបែបនេះ នៅលើកក្រោយៗទៀត។
ការតាំងពិព័រណ៍រថយន្តកម្ពុជាលើកទីមួយ មានរយៈពេល ៣ ថ្ងៃ គឺចាប់ពីថ្ងៃទី ១៥នេះ រហូតដល់ថ្ងៃទី ១៧ មីនា នៅទីក្រុងកោះពេជ្រ ដោយមានរថយន្តប្រហែល ៤០ គ្រឿង មកពីក្រុមហ៊ុនចំនួន ១០ ចូលរួមពិព័រណ៍។ ប្រិយមិត្តដែលចាប់អារម្មណ៍ អាចទៅទស្សនាពិព័រណ៍នេះដោយឥតគិតថ្លៃ។
អត្ថបទ៖ តុង
Categories:
ផ្សេងៗ,
ព័តមានជាតិ,
សិល្បះនិងកំសាន្ត