ក្រុងប៉ោយប៉ែត៖ ស្រ្តីម្នាក់ បត់ម៉ូតូឆ្លងថ្នល់ក្នុងទីប្រជុំជន ខ្វះការប្រុងប្រយ័ត្នទៅបុករថយន្តកាមរី ដែលគេចត ចោលបណ្តាលឲ្យម៉ូតូដួល ចំណែកមនុស្សខ្ទាតចូលរថយន្តសណ្ដោងរបស់ថៃ កិនបែកក្បាលបែកក្បាល ធ្លាយខួរ ស្លាប់នៅនឹងកន្លែង យ៉ាងអាណោអាធ័ម…។
ហេតុការណ៍នេះ បានកើតឡើងកាលពីវេលាម៉ោង ៥និង ២០នាទីល្ងាចថ្ងៃទី ១៩មីនាឆ្នាំ២០១៣ នៅលើ កំណាត់ផ្លូវជាតិលេខ៥ ត្រង់ផ្លូវបំបែកចូលផ្សារអគ្គៈថ្មី ស្ថិតនៅភូមិក្បាលកោះ សង្កាត់-ក្រុងប៉ោយប៉ែត ខេត្តបន្ទាយមានជ័យ ។
ស្ត្រីរងគ្រោះឈ្មោះ ជា បុប្ផា អាយុជាង ៣០ឆ្នាំ ជាក្រមុំចាស់ និងជាអាជីវករលក់ឥវ៉ាន់ឲ្យគេ នៅផ្សារ(រោងក្លឿ) នៃប្រទេសថៃ និងមានទីលំនៅភូមិគីឡូម៉ែត្រលេខ៤ សង្កាត់ផ្សារកណ្ដាល ក្រុងប៉ោយប៉ែត បើកបរម៉ូតូម៉ាកហុងដា ឌ្រីមសេ១២៥ ស៊េរីឆ្នាំ២០១០ ពណ៌ខ្មៅ ពាក់ស្លាកលេខ កំពង់ចាម 1E-1233 ។ ចំណែករថយន្តបង្កហេតុ ជាប្រភេទរថយន្តសណ្ដោង ម៉ាកអ៊ីស្សុយស៊ុយ ចង្កូតស្ដាំ ពាក់ស្លាកលេខ70-០393 ស្រះកែវ បើកបរដោយជនជាតិថៃ។
ប្រភពព័ត៌មានប្រាប់ឲ្យដឹងថា មុនដំបូង គាត់ម៉ូតូបើកពីទិស កើតឆ្ពោះទៅលិច ស្រាប់តែភ្លាមនោះ ម៉ូតូបត់ទៅខាងឆ្វេងដៃទៅបុកនឹងរថយន្តកាមរីមួយគ្រឿងពណ៌ស ដែលចតនៅកន្លែងកើតហេតុ បណ្តាលម៉ូតូដួល និងបានខ្ទាតចូលរថយន្តសណ្ដោងម៉ាកអ៊ីស្សុយស៊ុយ បុកចំខាងមុខរថយន្ត ។ចំណែកមនុស្ស ផ្លោងចូលកង់រថយន្តខាងក្រោយជនរងគ្រោះចូលទៅខាងក្រោមកង់ កិនបែកក្បាលចេញខួរស្លាប់នៅនឹងកន្លែងតែម្តង។
ភ្លាមៗនោះ គេឃើញលោកសៅ សារឿន នាយផ្នែកនគរបាលចរាចរណ៍ ព្រមទាំងកម្លាំងសមត្ថកិច្ចចរាចរណ៍ប្រចាំក្រុងប៉ោយប៉ែត ចុះមកវាស់វែងកន្លែងកើតហេតុ និងឃាត់ខ្លួនអ្នកបើកបររថយន្តបង្កហេតុភ្លាមៗ ដើម្បីធ្វើការសួរនាំ នៅអធិការក្រុងប៉ោយប៉ែត។
គួរបញ្ជាក់ផងដែរថា រថយន្តកាមរី ខណៈពេលដែលសមត្ថកិច្ចមិនទាន់ចុះទៅដល់កន្លែងកើតហេតុ ក៏បានដាក់មេប្រូចបាត់ស្រមោលតែម្តង។
ប្រជាពលរដ្ឋ ជាច្រើនបានរិះគន់ថា នៅចំណុចកើតហេតុនេះ ឧស្សាហ៍មានគ្រោះថ្នាក់ជាញឹកញាប់មកហើយ ព្រោះតែកន្លែងនោះជាទីប្រជុំជនដែលមានផ្លូនបត់ចេញចូលផ្សារអគ្គៈផង។ ម៉្យាងទៀត ត្រូវបានក្រុមអ្នករត់តាក់ស៊ីឆ្វែលរថយន្ត និងចតគ្មានសណ្តាប់ធ្នាប់ខ្លះរត់ដេញចាប់ម៉ូយយ៉ាងអនាធិបតេយ្យយ៉ាងដុះស្លែ ក្លាយទៅជាកន្លែងបេនជជុះ ទើបបានជាចំណុចម្តុំនោះ ឧស្សាហ៍គ្រោះថ្នាក់បំផុត៕
Categories:
ព័តមានជាតិ