កែប ៖ គ្រូបង្រៀនម្នាក់ខណៈពេលជិះម៉ូតូម្នាក់ឯងត្រូវរថយន្តក្រុងដឹកអ្នកដំណើរបើកបុកចំពីមុខយ៉ាងពេញទំហឹង រួចកិនពីលើជនរងគ្រោះចំពាក់កណ្តាលខ្លួន បណ្តាលឲ្យស្លាប់ភ្លាមៗនៅកន្លែងកើតហេតុ។ ដោយគ្រោះថ្នាក់នេះបន្ទាប់ពីកើតឡើងអ្នកបើកបររថយន្តបានដាក់មេប្រូចបាត់ស្រមោលឈឹង។
ហេតុការណ៍ដ៏រន្ធត់ខាងលើបានកើតឡើងនៅលើផ្លូវលេខ៣៣Aចន្លោះបង្គោលគីឡូម៉ែត្រ១៦និង១៧ សិ្ថតក្នុងភូមិកែវក្រសាំង សង្កាត់កែប ក្រុង-ខេត្តកែប កាលពីល្ងាច ថ្ងៃអាទិត្យ ទី២៤ខែមិនា ឆ្នាំ២០១៣វេលាម៉ោង១៧និង៣០នាទី។
សាក្សីដែលឃើញហេតុការណ៍ខាងលើបាននិយាយថា មុនពេលកើតគ្រោះថ្នាក់ដ៏អាក្រក់នេះ គេបានឃើញជនរងគ្រោះជិះម៉ូតូម្នាក់ឯងម៉ាកC125ពណ៌ខ្មៅសេរីឆ្នាំ២០០៧ ក្នុងទិសដៅពីត្បូងទៅជើងដោយប្រើល្បឿនមធ្យម លុះមកដល់ចំណុចគ្រោះថ្នាក់ដែលជាចំណុចផ្លូវកោងផងនោះ ជនរងគ្រោះបានគេចនឹងម៉ូតូ១គ្រឿងទៀតនៅខាងមុខ ទើបជនរងគ្រោះកាច់ចង្កូតរេទៅផ្លូវខាងឆ្វេង គាប់ជួនមានរថយន្តក្រុងដឹកអ្នកដំណើរបោះពួយយ៉ាងលឿនមកពីជើងក្នុងទិសដៅបញ្ច្រាសគ្នា ហើយខណៈនោះជនរងគ្រោះបានគេចពីឆ្វេងដៃបំណងទៅរកផ្លូវខាងស្តាំរបស់ខ្លួនវិញ ទើបធ្វើឲ្យយានយន្តទាំង២គ្រឿងព្រលះគ្នាចំពីមុខពេញទំហឹង បណ្តាលឲ្យបុរសគ្រូបង្រៀនជាម្ចាស់ម៉ូតូត្រូវរថយន្តក្រុង
បុកនិងកិនពីលើអូសចំងាយប្រមាណ៨ម៉ែត្រ ស្លាប់យ៉ាងអាណោចអាធ័មក្នុងថ្លុកឈាមតែម្តង។ ពាក់ព័ន្ធនឹងករណីគ្រោះថ្នាក់នេះដែរ ប៉ូលិសចរាចរខេត្តកែបបានឲ្យដឹងថា អ្នកស្លាប់ក្នុងហេតុការណ៍ខាងលើជាគ្រូបង្រៀន មានឈ្មោះស្តើង សំអាត ភេទប្រុស អាយុ២៥ឆ្នាំ មានទីលំនៅស្ថិតក្នុងភូមិ-សង្កាត់កើតហេតុខាងលើ ដោយជនរងគ្រោះជិះម៉ូតូម៉ាកC125ពណ៌ខ្មៅ ពាក់ស្លាកលេខ កែប 1A-0940។ ដោយឡែករថយន្តបង្កជារថយន្តក្រុងដឹកអ្នកដំណើរ របស់ក្រុមហ៊ុនហ៊ួរ លាន ពាក់ស្លាកលេខបាត់ដំបង3A-0362ក្រោយកើតហេតុអ្នកបើកបរគេចខ្លួនបាត់ ទើបប៉ូលិសអូសយកយានយន្តទៅរក្សាទុកនៅអធិការដ្ឋានក្រុងកែបសំរាប់ដោះស្រាយគ្នាជាក្រោយ៕
Categories:
ព័តមានជាតិ