ភ្នំពេញ៖ ប៉ូលិសពាក់ស័ក្ដិ៤ម្នាក់ស្ថិតក្នុងសភាពស្រវឹងជោគជាំបានបើករថយន្តម៉ាក់camary ឆ្លាមពណ៌ទឹកប្រាក់ពាក់ស្លាក់លេខភ្នំពេញ2P-1895 បើកទៅបុកគូថរថយន្តក្រុងរបស់ក្រុមហ៊ុនពន្លឺអង្គ ពីភ្នំពេញទៅប៉យប៉ែតដោយមានផ្ទុកអ្នកដំណើរពេញដែលកំពុងឈប់ចតនៅចិញ្ចើមផ្លូវមុខចំណតមុខក្រុមហ៊ុនមេគង្គអ៊ិចព្រែស។
ហេតុការណ៍គ្រោះថ្នាក់ចរាចរណ៍នេះ បានកើតឡើងនៅវេលាម៉ោង២២និង៣០នាទីយប់ ថ្ងៃទី ២១ ខែមីនា ឆ្នាំ២០១៣ ស្ថិតនៅតាមបណ្ដោយផ្លូវជាតិលេខ៥ ក្រុម១៤ ភូមិផ្សារតូច សង្កាត់ទួលសង្កែ ខណ្ឌឫស្សីកែវ រាជធានីភ្នំពេញ។
សាក្សីនៅកន្លែងកើតហេតុបានឲ្យដឹងថា មុនពេលកើតហេតុ គេឃើញរថយន្តក្រុងដែលមានផ្ទុកអ្នកដំណើរពេញឈប់ចតនៅកន្លែងកើតហេតុខាងលើ (រថយន្តខូចដាក់លេខមិនចូល) យោងតាមសំដី លោក សុខ សឿន អាយុ៥៣ឆ្នាំ បានឲ្យដឹងថា គេឃើញរថយន្តបង្កហេតុម៉ាក់camary ឆ្លាមបើកបរយ៉ាងលឿនក្នុងសភាពស្រវឹងស្រាជោគជាំ បានរេចង្កូតទៅបុកគូថរថយន្តក្រុងពីក្រោយយ៉ាងពេញទំហឹង បណ្ដាលឲ្យខូចខាតផ្នែកខាងមុខរបស់រថយន្តcamaryឆ្លាម នៅនិងកន្លែងកើតហេតុហើយអ្នកបើករថយន្តបង្កត្រូវបានគេស្គាល់ ឈ្មោះ ឯម បាណាន ភេទប្រុស អាយុ៣៤ឆ្នាំ ជាមន្ត្រីប៉ូលិសពាក់ស័ក្ដិ៤ បន្ទាប់ពីបង្កហេតុគ្រោះថ្នាក់ចរាចរណ៍រួចមក មន្ត្រីប៉ូលិសរូបនោះបានបើកទ្វាររថយន្តចុះមកព្រមទាំងកាន់កាំភ្លើងខ្លីម៉ាកK54 រូចធ្វើសកម្មភាពបាញ់ដីគំរាមអ្នកបើកបររថយន្តក្រុងដើម្បីបន្ធូរកំហឹង ក្រោយពេលកើតហេតុ គេបានឃើញប៉ូលិសនគរបាលប៉ុស្តិ៍ទូលសង្កែបានចុះមកធ្វើអន្តរាគមន៍ទាន់ពេលវេលា ព្រមទាំងធ្វើការឃាត់ខ្លួនជនបង្កហេតុ និងដកហូតអាវុធខ្លីយកមករក្សាទុក នឹងនាំខ្លួនជនបង្កយកទៅអធិការដ្ឋាននគរបាលខណ្ឌឫស្សីកែវ ដើម្បីសាកសួរ ព្រមទាំងនាំយករថយន្តបង្កទៅរក្សាទុកនៅប៉ុស្តិ៍នគរបាលទូលសង្កែដើម្បីដោះស្រាយទៅតាមនីតិវិធីច្បាប់ហើយ និងកសាងសំណុំរឿងបញ្ជូនជនសង្ស័យទៅតុលាការចាត់ការតាមផ្លូវច្បាប់៕
ឃិត សុខា
Categories:
ព័តមានជាតិ