ភ្នំពេញ ៖ បុរសម្នាក់ក្នុងចំណោមបក្ខពួក៤នាក់ ដែលបានព្រួតគ្នាវាយធ្វើបាបជនរងគ្រោះម្នាក់បណ្ដាលឲ្យបែកក្បាលដេរ១១ថ្នេរ ហើយព្រមទាំងជាប់ចោទថា បានដោះយកចិញ្ចៀនពេជ្រ១វង់ដែលមាន តម្លៃ៣ ៥០០ពាន់ដុល្លា កាលពីថ្ងៃទី១២ ខែមីនា ឆ្នាំ២០១៣ វេលាម៉ោង ២០និង៣០នាទី នៅចំណុចមុខផ្ទះលេខ៨៩ ផ្លូវសហព័ន្ធរុស្ស៊ី ភូមិទឹកថ្លា សង្កាត់ទឹកថ្លា ខណ្ឌសែនសុខ រាជធានីភ្នំពេញនោះ ត្រូវបាននគរបាលការិយាល័យស៊ើបការណ៍នៃនាយកដ្ឋាននគរបាលព្រហ្មទណ្ឌក្រសួងមហាផ្ទៃបានសម្រេចកសាងសំណុំរឿងបញ្ជូនសាលាដំបូងរាជធានីភ្នំពេញ ដើម្បីផ្ដន្ទាទោសតាមផ្លូវច្បាប់ កាលពីព្រឹកថ្ងៃទី១៥ ខែមីនា ឆ្នាំ២០១៣។
លោក ហម គន្ធី នាយការិយាល័យស៊ើបការណ៍ នៃនាយកដ្ឋាននគរបាលព្រហ្មទណ្ឌក្រសួងមហាផ្ទៃប្រាប់ឲ្យដឹងថា ជនជាប់ចោទខាងលើមានឈ្មោះ យឿន សារុំ ហៅ រុំ ភេទប្រុស អាយុ៣១ឆ្នាំ មុខរបរជាងកាត់ដេរ មានទីលំនៅផ្ទះលេខ១៦១D ផ្លូវសហព័ន្ធរុស្ស៊ី ភូមិផ្សារទឹកថ្លា សង្កាត់ទឹកថ្លា ខណ្ឌសែនសុខ។ ចំណែកជនរងគ្រោះនៅក្នុងករណីឈ្មោះ អ៊ុង ចក់ ភេទប្រុស អាយុ៣៥ឆ្នាំ រស់នៅផ្ទះលេខ៨៩ ភូមិផ្សារទឹកថ្លា ផ្លូវសហព័ន្ធរុស្ស៊ី សង្កាត់ទឹកថ្លា ខណ្ឌសែនសុខ។
លោកនាយការិយាល័យស៊ើបការណ៍ បានរៀបរាប់ប្រាប់ថា កាលពីថ្ងៃទី១២ ខែមីនាឆ្នាំ២០១៣ វេលាម៉ោង២០ និង៣០នាទី នៅមុខផ្ទះលេខ៨៩ ផ្លូវសហព័ន្ធរុស្ស៊ី សង្កាត់ទឹកថ្លា ខណ្ឌសែនសុខ ជនរងគ្រោះឈ្មោះអ៊ុង ចក់ កំពុងអង្គុយបោសសំអាតមុខផ្ទះរបស់ខ្លួនតែម្នាក់ឯង ក៏ស្រាប់តែជនសង្ស័យឈ្មោះ យឿនសារុំ បានកាន់ដំបងឆក់រួមនិងគ្នីគ្នា៣នាក់ទៀតស្ទុះវាយជនរងគ្រោះទាំងកំរោល បណ្តាលឲ្យបែកក្បាលដេរ១១ថ្នេរសន្លប់នៅនឹងកន្លែងកើតហេតុព្រមទាំងលួចយកចិញ្ចៀនពេជ្រ ១វង់ តម្លៃ ៣ ៥០០ដុល្លា រួច ហើយក្រុមជនល្មើសក៏នាំគ្នា គេចខ្លួនបាត់ស្រមោល។
នៅក្នុងករណីនេះផងដែរជនរងគ្រោះ អ៊ុង ចក់ ក៏បានឲ្យដឹងថា កន្លងមកខ្លួនធ្លាប់មានទំនាស់ជាមួយជនសង្ស័យខាងលើនេះដែលមានផ្ទះជាប់គ្នាប៉ុន្តែខ្លួនមិនដែលមានការតបតអ្វីឡើយ លុះមកដល់ថ្ងៃកើតហេតុខាងលើខ្លួនកំពុងបោសសំអាតមុខផ្ទះម្នាក់ឯង ស្រាប់តែឈ្មោះ យឿន សារុំ កាន់ដំបងឆក់និងគ្នីគ្នា៣នាក់បានស្ទុះមកវាយក្បាលខ្លួនទាំងកំរោលបណ្តាលឲ្យដួលសន្លប់នៅនិងកន្លែងកើតហេតុ លុះពេលដឹងខ្លួនឡើងក៏បាត់ចិញ្ចៀនពេជ្រ១វង់តម្លៃជាង៣ពាន់ដុល្លា ហើយបក្ខពួកវាក៏បានរត់បាត់អស់ទៅ។ ក្រោយពីកើតហេតុខ្លួនត្រូវបងប្អូនក្រុមគ្រួសារដឹកបញ្ជូនមកព្យាបាលដេរ អស់ ១១ថ្នេរ និងដាក់ពាក្យបណ្តឹងមកសមត្ថកិច្ច ដើម្បីជួយរកយុត្តិធម៌។
លោក ហម គន្ធី ប្រាប់បន្តថា ដោយមានការបញ្ជាពីលោកឧត្តមសេនីយ៍ឯក ម៉ក ជីតូ ប្រធាននាយកដ្ឋានកណ្តាលនគរបាលយុត្តិធម៌ ក៏ដូចជាការបញ្ជាផ្ទាល់ពីលោកឧត្តមសេនីយ៍ទោ អ៊ិន បូរ៉ា ប្រធាននាយកដ្ឋាននគរបាលព្រហ្មទណ្ឌ ទើបលោកដឹកនាំកម្លាំងតាមស្វែងរកឃាត់ខ្លួនជនល្មើសខាងលើ ដើម្បីយកដាក់ទោសតាមនីតិវិធី។
លោកប្រាប់ថា ក្រោយពីទទួលបានការបំភ្លឺរបស់សាក្សីនិងជនរងគ្រោះរួមជាមួយចម្លើយសារភាពពីជនសង្ស័យ ព្រមទាំងខ្សែវីដេអូឃ្លីបបង្ហាញពីសកម្មភាពនោះ លោកក៏បានសម្រេចកសាងសំណុំរឿងបញ្ជូនទៅសាលាដំបូងរាជធានីភ្នំពេញ ដើម្បីដាក់ទោសទណ្ឌតាមច្បាប់៕
Categories:
ព័តមានជាតិ