ភ្នំពេញ៖ ជនបង្កភាពចលាចលម្នាក់ ត្រូវបានសមត្ថកិច្ចប្រាប់ថា មានសតិមិនប្រក្រតី មានទំនាស់ជាមួយអ្នករួមដំណើរក្នុងរថយន្តបានយកកាំបិត និងពូថៅដេញកាប់ និងចាក់ ធ្វើឲ្យផ្អើលឆោឡោ នៅរង្វង់មូលចោមចៅ ស្ថិតក្នុងភូមិចុងថ្នល់បំបែក សង្កាត់ចោមចៅ ខណ្ឌពោធិ៍សែនជ័យ កាលពីវេលាម៉ោង១ និង១០ នាទីរសៀលថ្ងៃទី២០ មីនា ។
ប្រភពព័ត៌មានពីសមត្ថកិច្ចបានឲ្យដឹងថា ជនមានសតិមិនប្រក្រតីឈ្មោះ ជូ គួង ភេទប្រុស អាយុ ៣៤ឆ្នាំ មុខរបរមិនពិតប្រាកដ មានស្រុកកំណើតនៅភូមិស្រែអំបិល ឃុំស្រែអំបិល ស្រុកស្រែអំបិល ខេត្តកោះកុង ។
មុនពេលកើតហេតុ បុរសរូបនោះ ជិះរថយន្តក្រុងពីខេត្តកោះកុង មកក្រុងភ្នំពេញ ហើយបានឈ្លោះប្រកែកជាមួយអ្នករួមដំណើរជាមួយ ខណៈពេលរថយន្តក្រុងឈប់នៅចំណតរង្វង់មូលចោមចៅ ស្រាប់តែបុរសនោះ រូបយកកាំបិត និងពូថៅដេញកាប់ និងចាក់ទៅលើជនរងគ្រោះ បណ្តាលឲ្យមានភាពភ្ញាក់ផ្អើលដល់ប៉ូលិសប៉ុស្តិ៍ចោមចៅចុះទៅជួយអន្តរាគមន៍ឃាត់ខ្លួនជនបង្ក និងវត្ថុតាងយកទៅសាកសួរ នៅប៉ុស្តិ៍នគរបាលរដ្ឋបាលចោមចៅ ។
ប្រភពដដែលបន្តទៀតថា ក្នុងហេតុការណ៍នោះ ជនរងគ្រោះមិនមានរងរបួសទេ ចំណែកជនបង្កមិនព្រម ឲ្យសមត្ថកិច្ចឃាត់ខ្លួនតាមសម្រួលទេ ទាល់តែសមត្ថកិច្ចវាយឲ្យជ្រុះកាំបិតនិងពូថៅសិន ទើបឃាត់ខ្លួនយកទៅសាកសួរនៅប៉ុស្តិ៍ចោមចៅ ។ ប៉ុន្តែពេលសមត្ថកិច្ចសាកសួរបុរសរូបនោះ និយាយមិនដឹងខុសត្រូវដូចមនុស្សមានសតិមិនប្រក្រតី ៕
Categories:
ព័តមានជាតិ