បន្ទាយមានជ័យ ៖ បន្ទាប់ពីឥទ្ធិពលភ្លៀងផ្គររន្ទះកក់ខែនៅខេត្តបន្ទាយមានជ័យកាលពីពាក់កណ្ដាលខែមីនា ២០១៣ ធ្វើឲ្យលំនៅដ្ឋានសាលារៀនសាលាឆទានជាង៣០០ខ្នងបានបំផ្លាញរួចមក ស្រាប់តែភ្លៀងខ្យល់ព្យុះរបៀបនេះម្ដងទៀតកាលពីរសៀលថ្ងៃទី១៧ ខែមីនា ឆ្នាំ២០១៣ បានមកបំផ្លាញលំនៅដ្ឋានសាលារៀនស្ពានឈើអស់ចំនួនជាង៥០ខ្នងចំកណ្ដាលទីរួមខេត្តបន្ទាយមានជ័យ។
លោក រ៉ែម វីរៈ អធិការក្រុងសិរីសោភ័ណជាទីរួមខេត្តបន្ទាយមានជ័យបានឲ្យដឹងថា កាលពីរសៀលម៉ោង៥ដល់ព្រលប់ថ្ងៃទី ១៧ ខែមីនា មានខ្យល់ព្យុះលាយទៅដោយភ្លៀងបក់បោកចំកណ្ដាលទីក្រុងសិរីសោភ័ណធ្វើឲ្យលំនៅដ្ឋានសាលារៀនស្ពាន ប៉ាណូពាណិជ្ជកម្មជាច្រើនឋិតនៅសង្កាត់ចំនួន៣ គឺសង្កាត់ព្រះពន្លា សង្កាត់អូរអំបិល សង្កាត់កំពុងស្វាយ ត្រូវបានដួលរលំនិងដើមឈើសង្កត់លើ នាំឲ្យបាក់បង្គោលភ្លើង។ សង្កាត់អូរអំបិល មានផ្ទះ៩ខ្នងដួលរលំទាំងស្រុង , ១៤ខ្នងប៉ើងដំបូល , ៥ខ្នងរបើកជញ្ជាំងនិងសាលារៀន៣ខ្នង(ឋិតនៅក្នុងភូមិសែសិន) ១ខ្នងត្រូវដើមឈើដួលរលំលើបណ្ដាលឲ្យបាក់ទាំងស្រុង ឯ២ខ្នងទៀតប៉ើងដំបូល ព្រមទាំងបង្គោលភ្លើងចំនួន២ត្រូវបានបាក់សង្កត់លើផ្ទះប្រជាពលរដ្ឋ។ សង្កាត់ព្រះពន្លាមានផ្ទះ១៧ខ្នង របើកជញ្ជាំង ប៉ើងដំបូលនិងស្ពានឈើឆ្លងស្ទឹងព្រះពន្លាដែលមានដំបូលប្រក់ស័ង្កសីប្រវែងជាង១០០ម៉ែត្រសាងសង់នៅទសវត្សរ៍ទី៩០ ក៏ត្រូវបានភ្លៀងខ្យល់បក់បោកដំបូលនិងស្ពានទ្រេត ក្រៅពីនោះនៅមានប៉ាណូពាណិជ្ជកម្មជាច្រើនផ្ទាំងធំៗក៏ត្រូវបានខ្យល់បក់ដួលរលំ។ សង្កាត់កំពង់ស្វាយ មានផ្ទះ២ខ្នងប៉ើងដំបូល។ជាមួយនឹងគ្រោះធម្មជាតិនេះមិនបណ្ដាលឲ្យប៉ះពាល់គ្រោះថ្នាក់ដល់មនុស្សធ្ងន់ធ្ងរឡើយ។
ក្នុងហេតុការណ៍ខ្យល់ព្យុះដួលរលំនេះម្ចាស់ផ្ទះដែលរងផលប៉ះពាល់បានឲ្យដឹងថា ដើមឡើយមានភ្លៀងធ្លាក់តិចៗពុំមានខ្យល់នោះទេ លុះដល់ម៉ោងប្រមាណជា៥ ស្រាប់តែមានភ្លៀងធ្លាក់យ៉ាងខ្លាំងលាយជាមួយនឹងខ្យល់បក់បោកគួរឲ្យខ្លាចក៏ធ្វើឲ្យដំបូលផ្ទះរបស់ពួកគាត់ប៉ើងនិងបាក់រលំដែលហេតុការណ៍ទាំងនេះកន្លងជាច្រើនឆ្នាំពុំដែលកើតមានឡើងនៅកណ្ដាលក្រុងសិរីសោភ័ណឡើយ។
គួរបញ្ជាក់ថា ហេតុការណ៍ខ្យល់ព្យុះដួលរលំផ្ទះនេះនៅពាក់កណ្ដាលខែមីនាខេត្តបន្ទាយមានជ័យទទួលរងគ្រោះចំនួន២លើក ដែលលើកទី១កាលពីថ្ងៃទី១៤ មានលំនៅដ្ឋានសាលារៀនសាលាឆទានចំនួន៤០៥ខ្នងត្រូវបានរងផលប៉ះពាល់នៅស្រុកថ្មពួកនិងស្រុកស្វាយចេកហើយលើកទី២នេះជាង៥០ខ្នងដែលទំហំនៃការខូចខាតទាំងនេះខេត្តបន្ទាយមានជ័យមិនធ្លាប់មានឡើយ៕
Categories:
ព័តមានជាតិ