ក្រចេះ ៖ ផ្ទះចំនួន៤៤ខ្នងត្រូវបានខ្យល់កំណាចបំផ្លាញបណ្តាលឱ្យរបើកដំបូងនិងបាក់ដើមគគីរសង្កត់ផ្ទះមួយខ្នង និងស្លាប់មនុស្សម្នាក់របួស៣នាក់ ដែលករណីខាងលើនេះបានកើតឡើងនៅវេលាម៉ោងប្រមាណជា ៧ និង១០នាទីល្ងាច ថ្ងៃទី ១៤ ខែ មីនា ឆ្នាំ ២០១៣ នៅភូមិរោងចក្រ ក្បាលស្នួល និងភូមិ ក្រសាំង ស្ថិតនៅក្នុងឃុំ ស្នួល ស្រុកស្នួល ខេត្តក្រចេះ ។
បើតាមការឲ្យដឹងពីលោក មេឃុំស្នួលរៀបរាប់ថា ភ្លៀងលាយខ្យល់បានបោកបក់យ៉ាងខ្លាំងប៉ះចំផ្ទះប្រជាពលរដ្ឋចំនួន ៤៥ គ្រួសារ បណ្តាលឲ្យផ្ទះថ្ម ឈើប្រក់ក្បឿង ស័ង្កសី ស្បូវ របើកដំបូល ខូចខាត យ៉ាងដំណំ ។ លោកបានបញ្ជាក់ទៀតថា ក្នុងចំណោម៤៥គ្រួសារនោះមានផ្ទះ១ខ្នងស្ថិតក្នុងភូមិក្បាលស្នួល ត្រូវបានដើមគគីរបាក់រលំសង្កត់លើធ្វើឲ្យមនុស្សនៅក្នុងផ្ទះស្លាប់ម្នាក់ និងរងរបួស៣នាក់ ក្នុងនោះមានក្មេង ប្រុសអាយុ៧ឆ្នាំម្នាក់របួសធ្ងន់បាក់ភ្លៅ។
លោកមេឃុំនិយាយបន្តថា ជនរងគ្រោះស្លាប់បានបង់អាយុជីវិតនោះមានឈ្មោះ ស៊ីម ប៊ុមធឹម ភេទប្រុស អាយុ ៤២ឆ្នាំ មានស្រុកកំណើត ភូមិតនឡងទី៣ ឃុំ ព្រៃខ្លា ស្រុក ព្រៃវែង ខេត្តព្រៃវែង ចំណាកស្រុកមកកាប់ចំការដាំដំណាំ។ រីឯជនរងរបួសធ្ងន់បាក់ឆ្អឹងខ្នងឈ្មោះ វ៉ា ភេទប្រុស អាយុ៤០ឆ្នាំ មកពីខេត្ត រតនៈគិរី បញ្ជូនទៅសំរាកនៅមន្ទីរពេទ្យបង្អែកខេត្តក្រចេះ និងម្នាក់ទៀតឈ្មោះ ឃ្លី ភេទ ប្រុស មិនស្គាល់ទីលំនៅ រងរបួសស្រាល ត្រឡប់ទៅផ្ទះវិញដើម្បីសំរាកព្យាបាល ចំពោះក្មេងប្រុសអាយុ៧ឆ្នាំ ឈ្មោះ ស៊ីម គឹមហួ ជាកូនប្រុសបង្កើតរបស់លោក ស៊ីម ប៊ុនធឹម ត្រូវបានបញ្ជូនទៅព្យាបាលនៅមន្ទីរពេទ្យគន្ធបុប្ផា រាជធានភ្នំពេញ។ ចំណែកជនរងគ្រោះ ដែលស្លាប់ត្រូវបានក្រុមគ្រួសារនាំយកទៅស្រុកកំណើតដើម្បីធ្វើបុណ្យតាមប្រពៃណី។
ដោយឡែកនៅព្រឹកថ្ងៃទី ១៥ ខែ មីនា ឆ្នាំ ២០១៣ បន្ទាប់ពីលោកអភិបាលខេត្តទទួលបាន ព័ត៌មានភ្លាម ក៏បានបញ្ជាឲ្យលោក ហឿ ស៊ីយ៉ែម អភិបាលរងខេត្តដឹកនាំក្រុមការងារ និងអាជ្ញាធរ ដែនដី ចុះទៅពិនិត្យនៅកន្លែងកើតហេតុជាក់ស្តែង និងបានចែកជូននូវថវិកា សំភារៈ គ្រឿងឧបភោគ បរិភោគ ហើយបានចាត់ចែងឲ្យសាខាកាកបាទក្រហមកម្ពុជាខេត្តត្រៀមអំណោយសង្គ្រោះ ចុះសួរសុខទុក្ខជនរងគ្រោះផងដែរ ក្នុងនោះមានសំភារៈប្រើប្រាស់ គ្រឿងឧបភោគ បរិភោគ ថវិកា មួយចំនួនដើម្បីយកទៅប្រគល់ឲ្យជនរងគ្រោះកំពុងសំរាកព្យាបាលនៅមន្ទីរពេទ្យបង្អែកខេត្ត និងត្រៀម សំភារៈ ថវិកាមួយចំនួនផ្សេងទៀត ដើម្បីចែកជូនគ្រួសារសព រួមទាំងក្រុមគ្រួសារដែលត្រូវបានខ្យល់បក់របើកដំបូលផ្ទះផងដែរ៕
Categories:
ព័តមានជាតិ