ភ្នំពេញ៖ រថយន្តCRVបើកជែងជាមួយរថយន្តCOOPER តាមបណ្ដោយផ្លូវភ្លោះអូឫស្សីកែង និងផ្លូវ មហាវិថីព្រះមុនីវង្ស ហើយបុកនិងបង្គោលភ្លើងនិង១គ្រឿងទៀតបុកចូលរោងអ្នកធ្វើសំណង់ដែលនៅក្បែរផ្លូវ។
ករណីរថយន្តពីរគ្រឿងបើកជែងគ្នានេះ បានកើតឡើងនៅវេលាម៉ោង០០និង១០នាទី ឈានចូលថ្ងៃទី១៩ ខែមីនា ឆ្នាំ២០១៣ ត្រង់ភ្លើងស្តុបផ្លូវព្រះមុនីវង្សកែងនិងផ្លូវភ្លោះអូឫស្សី ស្ថិតក្នុងសង្កាត់បេងរាំង ខណ្ឌដូនពេញ រាជធានីភ្នំពេញ។
រថយន្តCVR ស្លាក់លេខភ្នំពេញ2C-1369 ពណ៌ទឹកប្រាក់ បើកបរដោយបុរសម្នាក់មិនបានស្គាល់អត្តសញ្ញាណ ភេទប្រុស អាយុប្រហែល៣០ឆ្នាំ។ រីឯរថយន្តCOOPER ពាក់ស្លាក់លេខបណ្ដោះអាសន្ន 6108 ពណ៌ក្រហម ។
សាក្សីនៅកន្លែងកើតហេតុបានឲ្យដឹងថា មុនពេលកើតហេតុគេឃើញរថយន្តទាំងពីរគ្រឿងធ្វើដំណើរទិសពីលិចទៅកើតតាមបណ្ដោយផ្លូវភ្លោះអូឫស្សី ពេលមកដល់ចំណុចកើតហេតុកែងនិងភ្លើងស្តុបព្រះមុនីវង្ស ស្រាប់តែរេចង្កូត រថយន្តCOOPERទៅបុកបង្គោលភ្លើង រីឯរថយន្តCRVបុកទៅនិងរោងកម្មករសំណង់ដែលសង់នៅក្បែរនិងផ្លូវ សំណាងល្អមិនបង្កគ្រោះថ្នាក់ដល់មនុស្ស។ ក្រោយគ្រោះថ្នាក់ចរាចរហើយបានប្រហែល១៥នាទី ក្រុមអ្នកសាព័ត៌មានក៏ចុះទៅថត តែភ្លាមនោះត្រូវបានមិត្តភ័ក្ដិរបស់រថយន្តCOOPER ១ក្រុមជិះរថយន្តកូរ៉ូឡា ពណ៌ទឹកប្រាក់ពាក់ស្លាក់លេខភ្នំពេញ2X -7771 ចុះមក វាយទៅលើអ្នកកាសែតម្នាក់បណ្ដាលឲ្យផ្អើលដល់ប្រជាពលរដ្ឋ និងសមត្ថកិច្ចមើលព្រោងព្រាត ហើយក៏ឃាត់ខ្លួនជាប់២នាក់ប្រគល់ឲ្យសមត្ថកិច្ច។
បច្ចុប្បន្នជនបង្កត្រូវបានសមត្ថកិច្ចប៉ុស្តិ៍បឹងរាំងឃាត់ខ្លួនដើម្បីសួរចម្លើយ និងរថយន្តទាំងពីរគ្រឿងត្រូវបានសមត្ថកិច្ចសាលាក្រុងស្ទូចយកទៅរក្សាទុកដើម្បីចាត់ការតាមច្បាប់៕
សុខា រាត្រី
Categories:
ព័តមានជាតិ