ក្រុមនាយកផ្នែកលក់នៃក្រុមហ៊ុនផលិតរថយន្តទាំងនោះបាននិយាយពី ថ្ងៃសៅរ៍ថា រថយន្តដែលបើកនៅតាមផ្លូវនៅសហរដ្ឋអាមេរិកសព្វថ្ងៃនេះគិតជាមធ្យម គឺជារថយន្តចាស់បំផុតក្នុងប្រវត្តិសាស្ត្រហើយពលរដ្ឋអាមេរិកនឹង បន្តផ្លាស់ប្ដូររថយន្តទាំងនោះដោយជ្រើសរើសយករថយន្តដែលស៊ីសាំង តិចនិងមានបច្ចេកវិទ្យាកាន់តែទំនើបជាងមុន។ ក្រុមហ៊ុន Ford បានរាយការណ៍ពីការលក់រថយន្តដាច់បំផុតកាលពីខែកុម្ភៈក្នុងរយៈពេល ៦ឆ្នាំមកនេះ។
លោក Ken Czubay អនុប្រធានផ្នែកទីផ្សារ លក់ និងសេវាកម្មនៅអាមេរិករបស់ក្រុមហ៊ុន Ford បានថ្លែងពីថ្ងៃសៅរ៍ក្នុងសន្និសីទតាមទូរស័ព្ទមួយថា៖ «វាមិនអាចចៀសផុតបានទេថា ប្រហែលជាមានការផ្លាស់ប្តូររថយន្តតិចតួចប៉ុន្តែខ្ញុំគិតថាកត្តា វិជ្ជមានដែលបង្កើនឲ្យមានតម្រូវការរថយន្តនេះនឹងបន្តកើនឡើងទៀត »។
ការលក់រថយន្តធុនស្រាលនៅអាមេរិកកាលពីខែកុម្ភៈបានកើនឡើង ៣,៧ភាគរយឡើងដល់ ១,១៩លានគ្រឿង ពោលគឺត្រូវគ្នាទៅនឹងការព្យាកររបស់អ្នកវិភាគចំនួន ១០នាក់ដែលថាមានកំណើន ១,៧ភាគរយ។ អត្រាលក់រថយន្តប្រចាំឆ្នាំដែលកែសម្រួលតាមរដូវកាលបានកើនឡើងដល់ ចំនួន ១៥,៤លានគ្រឿងពីចំនួន១៤,៥លានគ្រឿងកាលពីឆ្នាំមុន។ អត្រាលក់រថយន្តជាមធ្យម ដែលប៉ាន់ប្រមាណដោយអ្នកវិភាគ១៥នាក់ មានចំនួន ១៥,៣លានគ្រឿង។
ការចែកចាយរថយន្តធុនតូចៗ និងរថយន្តដឹកទំនិញធុនស្រាលរបស់ក្រុមហ៊ុន Ford កាលពីខែមុនបានកើន៩,៣ភាគរយក្រុមហ៊ុន GM កើន ៧,២ភាគរយ ក្រុមហ៊ុន Toyota កើន ៤,៣ភាគរយនិងក្រុមហ៊ុន Chrysler Group LLC កើន ៤,១ភាគរយ។ នេះបើតាមសេចក្ដីថ្លែងការណ៍របស់ក្រុមហ៊ុនទាំងនេះ។
ការព្យាករជាមធ្យមរបស់អ្នកវិភាគ១១នាក់ថាការលក់រថយន្តរបស់ ក្រុមហ៊ុន Ford កើនបាន៩,៨ភាគរយ ក្រុមហ៊ុន GM កើន ៤,៩ភាគរយ និងក្រុមហ៊ុន Chrysler កើនឡើង ៤,៤ភាគរយ។ ក្រុមហ៊ុន GM និងក្រុមហ៊ុន Chrysler ដែលទុនភាគច្រើនគ្រប់គ្រងដោយក្រុមហ៊ុន Fiat SpA បានឲ្យដឹងដាច់ឡែកពីគ្នាថា ការលក់កាលពីខែកុម្ភៈគឺជាការលក់ដាច់បំផុតក្នុងរយៈពេល៥ឆ្នាំ មកនេះ។ ក្រុមហ៊ុន Toyota គ្រោងនឹងរាយការណ៍ពីកំណើនលក់របស់ខ្លួន ៨,៥ភាគរយដែលជាការប៉ាន់ប្រមាណជាមធ្យមរបស់ក្រុមអ្នកវិភាគចំនួន ៨នាក់៕ PN
Categories:
បច្ចេកវិទ្យាថ្មីៗ