ភ្នំពេញៈ ការនំាចូលម៉ូតូកាលពីឆ្នាំ២០១២បានកើនឡើង៥៥ភាគរយ បើធៀបនឹងរយៈពេលដូចគ្នាកាលពីឆ្នាំ២០១១។ នេះបើតាមទិន្នន័យពីក្រសួងសេដ្ឋកិច្ច និងហិរញ្ញវត្ថុ។
តួលេខបង្ហាញថា ការនាំចូលរយៈពេល១១ ខែឆ្នាំ២០១២ មានចំនួន២៦៤ ០៨៥ គ្រឿង ដែលមានតម្លៃ១៣៩លានដុល្លារដោយកើន១៧០ ៣៨០ គ្រឿងមានតម្លៃ៨៦,៥ លានដុល្លារ។
ស្ថានភាពសេដ្ឋកិច្ចនៅតាមតំបន់ជនបទមានការរីកចម្រើនរួមផ្សំនឹងការអភិវឌ្ឍផ្លូវថ្នល់និងការមិនទាន់មានសេវាដឹកជញ្ជូនសាធារណៈតាមទីប្រជុំជនគឺជាមូលហេតុចម្បងនៃកំណើននេះ។
លោក ផល រ៉ាប្រធានផ្នែកទីផ្សារនៃក្រុមហ៊ុន Japan Motorcycles ដែលជាអ្នកចែកចាយម៉ូតូម៉ាកហុងដាបានឲ្យដឹងថាថា៖ «យើងគួរចាំថាការប្រើប្រាស់ម៉ូតូផ្ទាល់ខ្លួននៅតែជាមធ្យោបាយធ្វើដំណើរដ៏ចាំបាច់សម្រាប់ប្រជាជនកម្ពុជា។ ខ្ញុំសង្កេតឃើញថាជីវភាពប្រជាជននៅតាមបណ្តាខេត្តកំពុងមានការកែប្រែល្អឡើងជាងពេលមុនៗដូច្នេះពួកគេអាចមានលទ្ធភាពទិញម៉ូតូសម្រាប់ជាមធ្យោបាយធ្វើដំណើរកាន់តែច្រើនឡើង។»
អ្នកស្រី វួច ឡាយដែលមានហាងលក់ម៉ូតូពីរនៅភ្នំពេញបានឲ្យដឹងថា ម៉ូតូជប៉ុនទទួលបានការគាំទ្រខ្លាំងពីអតិថិជននៅក្នុងប្រទេសកម្ពុជា។ អ្នកស្រីថា៖ «ខ្ញុំគិតថាម៉ូតូម៉ាកហុងដាអាចឈរនៅលំដាប់ទី១លើទីផ្សារម៉ូតូនៅខ្មែរបន្ទាប់មកម៉ូតូម៉ាកស៊ុយហ៊្សុយគីហើយម៉ូតូម៉ាកយ៉ាម៉ាហាអាចឈរនៅលំដាប់ទីបី។ក្រៅពីនេះក៏មានម៉ូតូនំាចូលពីប្រទេសចិននិងវៀតណាមដែរតែខ្ញុំគិតថានៅមានចំណែកទីផ្សារតូចនៅឡើយ»។
ទន្ទឹមនឹងការកើនឡើងនៃចំនួនម៉ូតូក៏មានការបារម្ភដែរអំពីការកើនឡើងនៃការកកស្ទះចរាចរណ៍និងអត្រាគ្រោះថ្នាក់ចរាចរណ៍។ លោក យក់ ចំរើនរិទ្ធិប្រធានគ្រប់គ្រងទូទៅនៃក្រុមហ៊ុនធានារ៉ាប់រង Forte Insurance ឲ្យដឹងថាការកើនឡើងចំនួនម៉ូតូចរាចរណ៍នៅតាមដងផ្លូវនឹងអាចបង្កឲ្យមានផលលំបាកជាច្រើនដល់ការធ្វើចរាចរណ៍បើមិនមានការគ្រប់គ្រងបានល្អទេនោះ៕
Categories:
ព័តមានជាតិ