ភ្នំពេញៈ លោកស្រី ឈិន សុគន្ធារី ហៅ យាយក្រពើ ប្រធានក្រុមប្រឹក្សាភិបាលក្រុមហ៊ុនឡាយីម៉ិច ហូលឌីងគ្រុប គ្រោងនឹងដាក់ពាក្យបណ្តឹងព្រហ្មទណ្ឌមួយទៅសាលាដំបូងរាជធានី ភ្នំពេញ នៅថ្ងៃចន្ទនេះ ប្តឹងចោទលោកអភិបាលរាជធានីភ្នំពេញ កែប ជុតិមា និងគូកនពីបទ«ក្លែងបន្លំការកសាងប័ណ្ណដោយបំពាន ដើម្បីកាន់កាប់និងរឹបអូសដីជាង៣៤ហិកតា»របស់គាត់ ស្ថិតនៅភូមិបាយាប សង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ និងទារជំងឺចិត្ត១០០លានដុល្លារអាមេរិក។
អាជ្ញាធរធ្វើការរុះរើឃ្លាំងជាការដ្ឋានរបស់យាយក្រពើ កាលពីម្សិលមិញ។ រូបថត ប៊ុត រស្មីគង្គា
នៅក្នុងពាក្យបណ្តឹងលោកស្រីឈិន សុគន្ធារី ដែលភ្នំពេញ ប៉ុស្តិ៍ ទទួលបានពីថ្ងៃអាទិត្យម្សិលមិញលោកស្រី ឈិន សុគន្ធារី បានចោទប្រកាន់ថា កាលពីថ្ងៃទី ៣០ ខែសីហា ឆ្នាំ២០១២ លោក កែប ជុតិមា អភិបាលរាជធានីភ្នំពេញ និងគូកនបានប្រើអំណាចដោយរំលោភ និងបានដកហូតដីរបស់គាត់ចំនួន៣៤២.២៣៦,៨៩ ម៉ែត្រការ៉េ (ប្រហែលជាង៣៤ហិកតា)ដែលលោកស្រីបានកាន់កាប់ដោយសន្តិភាព តាំងតែពីឆ្នាំ១៩៩៩ ព្រមទាំងបានបង់ពន្ធជូនរដ្ឋជារៀងរាល់ឆ្នាំទៀតផង។ ទីតាំងដីនោះស្ថិតនៅក្នុងសង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ។
លោកស្រីឈិន សុគន្ធារី បានថ្លែងថា៖ «ចាប់តាំងពីឆ្នាំ ១៩៩៩ ក្រុមហ៊ុននាងខ្ញុំ បានប្រមូល ទិញដីពីប្រជាពលរដ្ឋបានផ្ទៃដីសរុបជាង ៣៤ ហិកតា ដោយមានលិខិតផ្ទេរសិទ្ធិ កាន់កាប់ដីដែលទទួលស្គាល់ដោយ អាជ្ញាធរមូលដ្ឋានចំនួន១៨ច្បាប់។ អាជ្ញាធរមូលដ្ឋានបានចេញលិខិតអនុញ្ញាតឲ្យចាក់ដីបំពេញនិងបាន អនុញ្ញាត ឲ្យសាងសង់ទីស្នាក់ការនៅលើដីនោះ នាងខ្ញុំបានបង់ពន្ធលើអចលនទ្រព្យប្រចាំឆ្នាំ ២០១១ ជូនរដ្ឋរួចជាស្រេចហើយ ចំពោះដីដែលមានទីតាំងក្នុងកម្មវត្ថុខាងលើនេះ»។
លោកស្រី ឈិន សុគន្ធារី បានបន្តថា៖ «ទោះជាបានដឹងច្បាស់ថា ដីខាងលើនេះនាងខ្ញុំបានកាន់កាប់ ដោយស្របច្បាប់ហើយក៏ដោយ ក៏លោកកែប ជុតិមា និងគូកននៅតែបំពាន រំលោភដោយគ្មានក្រែងរអែងច្បាប់បន្តិចណាឡើយ ពួកគាត់ថែមទាំងបានធ្វើរបាយការណ៍ភូតកុហក សមេ្តចនាយករដ្ឋមន្រ្តី ថា នាងខ្ញុំរំលោភកាន់កាប់ដីសាធារណៈរបស់រដ្ឋទៅវិញ»។ «អាស្រ័យហេតុនេះ នាងខ្ញុំ សូមប្តឹងលោក កែប ជុតិមា និង គូកនពីការប្រើអំណាចដោយរំលោភ ការក្លែងបន្លំ ការកសាងប័ណ្ណដោយបំពាន និងការធ្វើរបាយការណ៍ភូតកុហក សមេ្តចនាយករដ្ឋមន្រ្តី ដើម្បីរឹបអូសយកដីរបស់នាងខ្ញុំស្របច្បាប់ចំនួនជាង ៣៤ហិកតា។ នាងខ្ញុំសូមសំណូមពរ ឲ្យសាលាដំបូងរាជធានីភ្នំពេញ ផ្តន្ទាទោស លោក កែប ជុតិមា និង គូកនតាមច្បាប់។ សុំឲ្យរដ្ឋប្រគល់ដីខាងលើមកនាងខ្ញុំវិញនិងបង្ខំឲ្យលោក កែប ជុតិមា និងគូកនសងជំងឺចិត្តមកនាងខ្ញុំ ចំនួន១០០ លានដុល្លារអាមេរិក»។
លោក កែប ជុតិមា អភិបាលរាជធានីភ្នំពេញ មិនអាចទាក់ទងសុំការអធិប្បាយបានទេកាលពីថ្ងៃម្សិលមិញ។
ទោះ យ៉ាងណា លោក ឡុង ឌីម៉ង់ អ្នកនាំពាក្យសាលារាជធានីភ្នំពេញបានមានប្រសាសន៍ថា សាលារាជធានីភ្នំពេញមិនភ្ញាក់ផ្អើលនឹងពាក្យបណ្ដឹងរបស់អ្នក ស្រី ឈិន សុគន្ធារី នោះទេ ព្រោះរឿងនេះជាសិទ្ធិរបស់អ្នកស្រី។
លោកអ្នកនាំពាក្យរូបនេះបានប្រាប់ភ្នំពេញប៉ុស្តិ៍កាលពី ថ្ងៃអាទិត្យថា៖«អ្នកស្រីបានរំលោភយកដីធ្លីរដ្ឋដោយខុសច្បាប់ នៅក្នុងខណ្ឌសែនសុខ រាជធានីភ្នំពេញ។ យើងប្ដឹងគាត់ទៅសាលាដំបូងរាជធានី ហើយតុលាការបានផ្ដន្ទាទោសអ្នកស្រីឲ្យជាប់ពន្ធនាគារ និងបង្គាប់ឲ្យចេញដីកាតាមចាប់ខ្លួនផងដែរ»។
លោកបន្ថែមថា៖«អាជ្ញាធរមានសមត្ថកិច្ច ឥឡូវនេះកំពុងស្វែងរកចាប់ខ្លួនអ្នកស្រី និងតាមរកកន្លែងដែលអ្នកស្រីរស់នៅ។ ខ្ញុំគិតថា តាមរយៈពាក្យបណ្ដឹងនេះអាជ្ញាធរមានសមត្ថកិច្ចនឹងរកឃើញអ្នក ស្រី ហើយអ្នកស្រីនឹងត្រូវចាប់ខ្លួនក្នុងពេលឆាប់ៗនេះ បើសិនអ្នកស្រីទៅដាក់ពាក្យបណ្ដឹងនៅតុលាការមែននោះ»។
គួរ រំឭកថា អ្នកស្រី ឈិន សុគន្ធារី ត្រូវតុលាការក្រុងភ្នំពេញផ្តន្ទាទោសកំបាំងមុខឲ្យជាប់ ពន្ធនាគាររយៈពេល៤ឆ្នាំ និង៦ខែ។ អ្នកស្រីត្រូវតុលាការចោទពីបទធ្វើឲ្យប៉ះពាល់កម្មសិទ្ធិ សាធារណៈនៅក្នុងតំបន់បឹងពោងពាយ។ អ្នកស្រី ត្រូវបានអាជ្ញាធរខណ្ឌសែនសុខ ប្ដឹងកាលពីខែកញ្ញា ឆ្នាំ២០១២ ពាក់ព័ន្ធនឹងការកាន់កាប់ដីទំហំជាង ៣៤ ហិកតា នៅក្នុងតំបន់បឹងពោងពាយ ស្ថិតនៅក្នុងខណ្ឌសែនសុខ៕ ដោយៈ ប៊ុត រស្មីគង្គា - ភ្នំពេញប៉ុស្តិ៍
Categories:
ព័តមានជាតិ