រតនគិរី ៖ គ្រាន់តែរឿងដូរមែមរីទូរស័ព្ទស្ដាប់បទចម្រៀងសោះកូនអកតញ្ញូចាក់ម្ដាយឪពុកនឹងគល់ឫស្សីចុងស្រួចស្ទើរស្លាប់ស្ទើររស់ ដែលហេតុការណ៍នេះបានកើតឡើងកាលពីថ្ងៃទី១៦ខែមីនា ឆ្នាំ២០១៣ ស្ថិតក្នុងភូមិឡូន សង្កាត់យក្សឡោម ក្រុងបានលុង ខេត្តរតនគិរី។
លោកតេង សាវុធ អធិការរងនគរបាលក្រុងបានលុង ខេត្តរតនគិរីទទួលបន្ទុកផ្នែកព្រហ្មទណ្ឌបានឲ្យដឹងថា នៅយប់ថ្ងៃទី១៦ ខែមីនា ឆ្នាំ២០១៣ ក្រុមគ្រួសារជនជាតិទំពួន រស់នៅភូមិឡូន សង្កាត់យក្សឡោម ក្រុងបានលុងបានជួបជុំគ្នាផឹកស្រាបន្តិចបន្តួច រួចឪពុកបានយកមែមរីទូរស័ព្ទរបស់កូន(ជនដៃដល់) ទៅដូរជាមួយអ្នកដទៃដើម្បីស្ដាប់បន្ត។ លុះពេលកូនប្រុសចិតឃោរឃៅនោះយកទូរស័ព្ទរបស់ខ្លួនមកស្ដាប់ម្ដង ស្រាប់តែឮបទចម្រៀង និងមែមេរីខុសពីរបស់ខ្លួន ក៏ឈ្លោះប្រកែកជាមួយឪពុក១មាត់២មាត់ ម្ដាយក៏ឃាត់កូននិងប្ដីកុំឲ្យឈ្លោះគ្នាទៀតព្រោះខ្មាសញាតិជិតខាង ម្យ៉ាងទៀតយប់អធ្រាត្រទៅហើយ។ ពេលនោះកូនប្រុសចិត្តឃោរឃៅក៏ស្ទុះទៅយកគល់ឫស្សីចុងស្រួចមកចាក់លើពោះម្ដាយបណ្ដាលឲ្យដាច់ពោះវៀន ឪពុកចូលទៅចាប់រួចក៏ចាក់ឪពុកនឹងគល់ឫស្សីចុងស្រួចចំគល់ដោះ បណ្ដាលឲ្យរងរបួសទាំង២នាក់ប្ដីប្រពន្ធ។
លោក តេង សាវុធ អធិការរងក្រុងបានលុងទទួលបន្ទុកព្រហ្មទណ្ឌបន្តទៀតថា ជនដៃដល់ត្រូវជាកូនឈ្មោះ សេង សុង ភេទប្រុសអាយុ២៣ឆ្នាំ ចំណែកជនរងគ្រោះជាឪពុកឈ្មោះ តេង មាន់ អាយុ៤៥ឆ្នាំ ម្ដាយឈ្មោះ និន លាវ អាយុ៤០ឆ្នាំ មុខរបរធ្វើស្រែចម្ការ។ ជនរងគ្រោះទាំង២នាក់ប្ដីប្រពន្ធកំពុងសម្រាកព្យាបាលនៅមន្ទីរពេទ្យបង្អែកខេត្តរតនគិរី រីឯជនដៃដល់ត្រូវសមត្ថកិច្ចនគរបាលកសាងសំណុំរឿងបញ្ជូនទៅតុលាការចាត់ការបន្តតាមនីតិវិធីច្បាប់។
គួរបញ្ជាក់ថា កូនចៅគ្រប់រូបបើមិនបានតបស្នងសងគុណឪពុកម្ដាយ គួរកុំធ្វើឲ្យឪពុកម្ដាយពិបាកចិត្ត៕
Categories:
ព័តមានជាតិ