ព្រះសីហនុ ៖ នាវាបណ្ណាល័យឈ្មោះLOGOSHOPEដែលបានចូលចតនៅកំពង់ផែស្វយ័តក្រុងព្រះកាលពីថ្ងៃទី៣ ខែកុម្ភៈ ឆ្នាំ២០១៣កន្លងមកពេលនេះបានចាកចេញពីកំពង់ផែក្រុងព្រះសីហនុវិញហើយកាលពីព្រឹកថ្ងៃទី១៩ ខែកុម្ភៈ ដើម្បីបន្តដំណើរឆ្ពោះទៅប្រទេសថៃបន្ទាប់ពីនាវាផ្ទុកសៀវភៅចម្រុះភាសាប្រមាណ៥០០០ក្បាលនេះបានចូលចតអស់រយៈពេល១៦ថ្ងៃនៅក្រុងព្រះសីហនុ។
ក្នុងបេសកកម្មរយៈពេល១៦ថ្ងៃក្នុងទឹកដីតំបន់ទេសចរណ៍ក្រុងព្រះសីហនុនាវាLOGOSHOPEបានទទួលភ្ញៀវទេសចរណ៍ជាតិនិងអន្តរជាតិព្រមទាំងសិស្សានុសិស្សនិងប្រជាពលរដ្ឋក្នុងខេត្តចូលទស្សនានៅលើនាវានេះប្រមាណ៤ម៉ឺននាក់ផងដែរ។ ឆ្លៀតក្នុងឱកាសនៃការចូលចតនិងស្នាក់នៅក្នុងក្រុងព្រះសីហនុជាច្រើនថ្ងៃកន្លងមកនេះក្រុមបុគ្គលិកស្ម័គ្រចិត្តចម្រុះជាតិសាសន៍បម្រើការនៅលើនាវាខាងលើនេះបានចូលរួមចំណែកធ្វើកិច្ចការមនុស្សធម៌ដោយបានចែកអំណោយមានសំលៀកបំពាក់និងធុងចម្រោះទឹកស្អាតដល់ប្រជាពលរដ្ឋក្រីក្រប្រមាណ២០០០គ្រួសារដែលរស់នៅក្នុងខេត្តព្រះសីហនុ។ ទន្ទឹមនឹងសកម្មភាពខាងលើនេះដែរ ក្រុមបុគ្គលិកស្ម័គ្រចិត្តក៏បានចែកសម្ភារៈសិក្សាដល់សិស្សានុសិស្សនៅតាមសាលាជាច្រើនកន្លែងក្នុងខេត្តព្រះសីហនុ។
សូមបញ្ជាក់ថានាវាLOGOSHOPEមានសញ្ជាតិMaltaមានបណ្តោយ ១៣២.៥០ម៉ែត្រ ទទឹង ២០.៨ម៉ែត្រ ជម្រៅទឹក ៥.២ម៉ែត្រ មាននាវិក និងបុគ្គលិកស្ម័គ្រចិត្តអន្តរជាតិបម្រើការងារនៅលើនាវាដោយមិនគិតកម្រៃសរុបចំនួន ៣៥២នាក់ ដែលមាន ៥៧ជាតិសាសន៍ និងមានវប្បធម៌ផ្សេងគ្នា ហើយនាវា LOGOS HOPEនេះដឹកនាំដោយលោក James Thomas មេបញ្ជាការនៅលើនាវានេះ៕
Categories:
ព័តមានអន្តរជាតិ