ភ្នំពេញ ៖ សម្តេចអគ្គមហាពញាចក្រី ហេង សំរិន ប្រធានរដ្ឋសភានៃព្រះរាជាណាចក្រកម្ពុជា ក្នុងនាមព្រះរាជតំណាងដ៏ខ្ពង់ខ្ពស់ព្រះករុណា ព្រះមហាក្សត្រ នៃព្រះរាជាណាចក្រកម្ពុជា ព្រឹកថ្ងៃទី២៨ ខែកុម្ភៈ ឆ្នាំ២០១៣នេះ នៅវិមានរដ្ឋសភា បានអនុញ្ញាតឲ្យលោក វ្ល៉ាឌីមៀ ហាលហ្គាស(Vladimir Halgas) ចូលសំដែងការគួរសម និងថ្វាយសារតាំង ក្នុងឱកាសដែលលោកត្រូវបានតែងតាំងថ្មី ជាឯកអគ្គរដ្ឋទូត នៃសាធារណរដ្ឋស្លូវ៉ាគី ប្រចាំនៅកម្ពុជា។
ប្រធានខុទ្ទកាល័យសម្តេចប្រធានរដ្ឋសភា លោក គាំម កុសល បានមានប្រសាសន៍ប្រាប់អ្នកសារព័ត៌មាននៅក្រោយជំនួបនោះថា លោកទូតថ្មីនៃសាធារណរដ្ឋស្លូវ៉ាគីបានថ្លែងអំណរគុណសម្តេច ដែលបានឲ្យលោកចូលជួបជួនសារតាំងនាពេលនេះ។ លោកបានជំរាបជូនថា ប្រទេសស្លូវ៉ាគីធ្លាប់មានទំនាក់ទំនងជាមួយកម្ពុជាជាយូរមកហើយ តាមរយៈការផ្លាស់ប្តូរទស្សនកិច្ចរវាងគ្នាទៅវិញទៅមក រវាងថ្នាក់ដឹកនាំប្រទេសទាំងពីរ ក៏ដូចជាព្រះមហាក្សត្រផងដែរ។ មួយវិញទៀត ក្នុងឋានៈលោកត្រូវបានតែងតាំងជាឯករដ្ឋទូត លោកនឹងខិតខំធ្វើយ៉ាងណា ដើម្បីជំរុញអ្នកវិនិយោគមកបណ្តាក់ទុននៅកម្ពុជា។ ក្នុងឋានៈលោកជាអ្នកការទូតនេះដែរ លោកនឹងខិតខំធ្វើយ៉ាងណាបង្កើននូវទំនាក់ទំនងជាមួយស្ថាប័ននានារបស់កម្ពុជា និងសហការយ៉ាងជិតស្និទ្ធជាមួយក្រសួងការបរទេសកម្ពុជា ធ្វើយ៉ាងណាឲ្យកិច្ចសហប្រតិការរវាងប្រទេសទាំងពីរកាន់តែរឹងមាំខ្លាំងក្លាថែមទៀត។ ក្នុងនោះដែរ លោកក៏សុំការគាំទ្រពីស្ថាប័ននីតិប្បញ្ញត្តិកម្ពុជា ពិសេសពីសម្តេចអគ្គមហាពញាចក្រីហេង សំរិន ប្រធានរដ្ឋសភា ដើម្បីឲ្យកិច្ចការងារការទូតរបស់លោកនៅកម្ពុជាប្រកបដោយជោគជ័យ។
ក្នុងនាមព្រះរាជតំណាងដ៏ខ្ពង់ខ្ពស់ព្រះករុណា ព្រះមហាក្សត្រ នៃព្រះរាជាណាចក្រកម្ពុជា សម្តេច បានសម្តែងនូវការស្វាគមន៍យ៉ាងកក់ក្តៅបំផុត ចំពោះលោក វ្ល៉ាឌីមៀ ហាលហ្គាស៏(Vladimir Halgas)ដែលត្រូវបានតែងតាំងជាឯកអគ្គរដ្ឋទូត នៃសាធារណរដ្ឋស្លូវ៉ាគី ប្រចាំនៅក្នុងប្រទេសកម្ពុជា។ សម្តេចមានជំនឿយ៉ាងមុតមាំថា តាមរយៈបេសកកម្មការទូតរបស់លោកនៅកម្ពុជានេះ លោកនឹងជំរុញឲ្យទំនាក់ទំនងការទូតពាណិជ្ជកម្ម និងសហប្រតិបត្តិការទ្វេភាគី រវាងប្រទេសទាំងពីរឲ្យបានកាន់តែប្រសើរឡើងថែមទៀត។
សម្តេចមានការពេញចិត្តយ៉ាងខ្លាំងដោយបានឃើញទំនាក់ទំនងរវាងប្រទេសទាំងពីរ កាន់តែត្រូវបានពង្រឹងនិងពង្រីកឥតឈប់ឈរពីមួយថ្ងៃទៅមួយថ្ងៃ តាមរយៈការផ្លាស់ប្តូរគណៈប្រតិភូជាន់ខ្ពស់ទៅវិញទៅមក។ ក្នុងព្រះរាជតំណាងដ៏ខ្ពង់ខ្ពស់នេះដែរ សម្តេចសូមថ្លែងអំណរគុណយ៉ាងជ្រាលជ្រៅចំពោះសាធារណរដ្ឋស្លូវ៉ាគី ដែលបានជួយឧបត្ថម្ភដល់ប្រជាជនកម្ពុជា ក្នុងការអភិវឌ្ឍប្រទេសជាតិនាពេលកន្លងមក។ សម្តេចសូមថ្លែងអំណរគុណផងដែរចំពោះសាធារណរដ្ឋស្លូវ៉ាគី ដែលបានគាំទ្រកម្ពុជាជាសមាជិកគណៈកម្មាធិការបេតិកភណ្ឌពិភពលោក ដែលបានបោះឆ្នោតកាលពីឆ្នាំ២០០៩ នៅទីក្រុងប៉ារីស។ សម្តេច បានអបអរសាទរចំពោះជោគជ័យទាំងឡាយរបស់ប្រជាជនស្លូវ៉ាគី សម្រេចបាននៅក្នុងការអភិវឌ្ឍលើគ្រប់វិស័យ ធ្វើឲ្យផលិតផលក្នុងស្រុកសម្រាប់មនុស្សម្នាក់ៗជាង២ម៉ឺនដុល្លារអាមេរិក ហើយបានបន្តថែរក្សាពូនជ្រុំ ចំណងមិត្តភាព សាមគ្គីភាព ដ៏កក់ក្តៅ និងកិច្ចសហប្រតិបត្តិការរវាងប្រទេសទាំងពីរកម្ពុជា-ស្លូវ៉ាគី ដើម្បីឧត្តមប្រយោជន៍ជាតិនិងប្រជាជននៃប្រទេសទាំងពីរ ក្នុងតំបន់និងពិភពលោក៕
Categories:
ព័តមានជាតិ