ភ្នំពេញ ៖ បុរសវ័យក្មេងម្នាក់បានស្លាប់ភ្លាមៗនៅនឹងកន្លែងកើតហេតុដោយសារតែ ស្រវឹងស្រាជិះម៉ូតូលឿនដូចហោះបុករបាំងដែកខណ្ឌចែកទ្រូងផ្លូវ សហព័ន្ធរុស្ស៊ីអស់ចំនួន៣ផ្ទាំង នៅចំណុចម្ដុំមុខអ្នកតាចិនកំប៉ោងស្ថិតក្នុងភូមិត្រពាំងឈូក សង្កាត់ទឹកថ្លា ខណ្ឌសែនសុខ កាលពីវេលាម៉ោង១២អធ្រាត្រឈានចូលថ្ងៃទី១ ខែមីនា ឆ្នាំ២០១៣។
សពជនរងគ្រោះត្រូវបានគេស្គាល់ឈ្មោះ ពិល គង្គា ភេទប្រុស អាយុ២១ឆ្នាំ ជានិស្សិតមានទីលំនៅផ្ទះលេខ13B ផ្លូវ២៥៣ សង្កាត់ទឹកល្អក់៣ ខណ្ឌទួលគោក រាជធានីភ្នំពេញ។សមត្ថកិច្ច និយាយថា មុនពេលកើតហេតុជនរងគ្រោះជិះម៉ូតូតាមបណ្ដោយផ្លូវសហព័ន្ធរុស្ស៊ី លុះដល់ចំណុចកើតហេតុក៏បានរេចង្កូតបុករបាំងដែកខណ្ឌចែកទ្រូងផ្លូវ បាក់អស់៣ផ្ទាំង ហើយម៉ូតូជនរងគ្រោះប៉ើងខ្ទាតចេញប្រហែល២០ម៉ែត្រ ចំណែកជនរងគ្រោះបានដាច់រយះបំពង់.ក និងបោកក្បាលស្លាប់ភ្លាមៗនៅកន្លែងកើតហេតុ។ប្រភពព័ត៌មាន ខ្លះពីប្រជាពលរដ្ឋបាននិយាយថា ជនរងគ្រោះត្រូវបានមនុស្សមួយក្រុមជិះម៉ូតូដេញវាយ និងធាក់ដួលទំនងជាមានទំនាស់គ្នាក្នុងវង់ផឹកស៊ី ឬក៏ត្រូវក្រុមចោរវាយប្លន់យកម៉ូតូ តែជនរងគ្រោះភ័យជិះរត់ក្នុងល្បឿនលឿនពេក ទើបបង្កឲ្យគ្រោះថ្នាក់ដូច្នេះ។ទោះបីជា យ៉ាងណាពុំមានអ្នកណាម្នាក់បានឃើញហេតុការណ៍ផ្ទាល់ភ្នែករួមទាំង សមត្ថកិច្ចមូលដ្ឋានផងរហូតដល់ជនរងគ្រោះស្លាប់ទើបមានការភ្ញាក់ផ្អើល។នៅ កន្លែងកើតហេតុជនរងគ្រោះមានក្លិនស្រា ហើយបានដេកស្លាប់នៅលើទ្រូងផ្លូវជាមួយម៉ូតូរបស់គាត់ស៊េរីថ្មី ម៉ាកស៊ុយស៊ូគីនិក ពណ៌ផ្កាឈូក គ្មានស្លាកលេខ ហើយសាកសពត្រូវបានប៉ូលិសដឹកយកទៅតម្កល់ទុកនៅក្នុងវត្តទឹកថ្លា ក្បែរនោះដើម្បីរង់ចាំឲ្យក្រុមគ្រួសារមកទទួលយកធ្វើបុណ្យ៕
Categories:
ព័តមានជាតិ