រាជធានី
ភ្នំពេញ ៖ គ្រោះថ្នាក់ចរាចរណ៍ រវាងម៉ូតូសេ១០០ មួយគ្រឿង
ជិះលើផ្លូវបញ្រ្ចាសទិសដៅចរាចរណ៍ ទៅបុកជាមួយម៉ូតូសេ១២៥
មួយគ្រឿងទៀត បណ្តាលឲ្យដួលរបួសធ្ងន់ ៣នាក់ ស្រាលម្នាក់ ។
ហេតុការណ៍នេះ
កើតឡើងនៅវេលាម៉ោង៤ និង៥០ នាទីទៀបភ្លឺថ្ងៃទី១៥ កុម្ភៈ
តាមមហាវិថីព្រះមុនីវង្ស ខាងត្បូងហាងនំប៉័ងបាយ័នពេទ្យចិន
ក្នុងសង្កាត់បឹងកេងកងទី២ ខណ្ឌចំការមន ។
សាក្សីឃើញហេតុការណ៍
បានឲ្យដឹងថា ម៉ូតូសេ១០០ ស៊េរី២០០២ ពណ៌ខ្មៅ ជិះម្នាក់ឯង
ខាងផ្លូវទិសដៅចរាចរណ៍ពីត្បូងទៅជើង ចំណែកម៉ូតូសេ១២៥ ពណ៌ខ្មៅ ជិះ៣នាក់
ស្រីម្នាក់ ប្រុស២នាក់ ពីជើងទៅត្បូង ក្នុងស្ថានភាពស្រវឹង
ខណៈមកដល់ចំណុចខាងលើ បានបុកគ្នាពេញទំហឹង បណ្តាលឲ្យរបួសធ្ងន់៣នាក់ ស្រីម្នាក់
ប្រុស២នាក់ និងរបួសស្រាលម្នាក់ ។ក្រោយពេលកើតហេតុ ជនរងគ្រោះរបួសធ្ងន់
ត្រូវរថយន្តសង្គ្រោះដឹកយកទៅព្យាបាលនៅមន្ទីរពេទ្យមិត្តភាពខ្មែរសូវៀត ។
រីឯម៉ូតូទាំងពីរគ្រឿង សមត្ថកិច្ចធ្វើការវាស់វែងរួចយកទៅរក្សាទុក
នៅខណ្ឌចំការមន ៕
Categories:
ព័តមានជាតិ