ភ្នំពេញ ៖ បុរសម្នាក់ជិះម៉ូតូលឿនដោយមានការប្រញាប់បានជិះវ៉ារថយន្តមួយគ្រឿងដែលនៅពីខាងមុខរបស់ ខ្លួនក្នុងទិសដៅស្របទិសគ្នា ខណៈកំពុងតែវ៉ាគ្នានោះបានប៉ះដៃចង្កូតជាមួយរថយន្តនោះរួចផ្លោងទៅបុកជាមួយរថយន្តមួយគ្រឿងទៀតជាប់អូសជាង១០ម៉ែត្រផ្ទុះកង់រថយន្តខាងក្រោយមួយគ្រាប់ខាងឆ្វេងបណ្តាលឲ្យអ្នកបើកបរម៉ូតូបែកក្បាលធ្លាយខួរស្លាប់ភ្លាមៗនៅនឹងកន្លែងកើតហេតុ។ ប៉ុន្តែរថយន្តដែលប៉ះដំបូងនោះពុំបានឈប់ទេ ដោយពុំរងការខូចខាតឡើយ។
ហេតុការណ៍នេះកើតឡើងកាលពីវេលាម៉ោង៥និង២០នាទីព្រឹក ថ្ងៃទី២៦ខែកុម្ភៈឆ្នាំ២០១៣ស្ថិតនៅតាមបណ្តោយផ្លូវសហព័ន្ធរុស្ស៊ីខាងមុខព្រលានយន្តហោះក្នុងភូមិតាងួន សង្កាត់កាកាប ខណ្ឌពោធិ៍សែនជ័យ រាជធានីភ្នំពេញ។
បើយោងតាមក្រុមគ្រួសាររបស់ជនរងគ្រោះបានឲ្យដឹងថា ជនរងគ្រោះមានឈ្មោះ ឡោ វុទ្ធី ភេទប្រុសអាយុ៣៥ឆ្នាំមានមុខរបរជាបុគ្គលិកក្រុមហ៊ុនរស់នៅក្នុងក្នុងភូមិព្រៃទា សង្កាត់ចោមចៅ ខណ្ឌពោធិ៍សែនជ័យ រងរបួសបែកក្បាលធ្លាយខួរស្លាប់នៅនឹងកន្លែងកើតហេតុ ជនរងគ្រោះជិះម៉ូតូមួយគ្រឿងម៉ាកណៃហត ពណ៌ខ្មៅ ពាក់ស្លាកលេខភ្នំពេញ 1AC-6427 ក្នុងទិសដៅពីលិចទៅកើតជិះម្នាក់ឯង រីឯរថយន្តដែលត្រូវម៉ូតូខ្ទាតទៅបុកនោះម៉ាកសាំយ៉ុង ពណ៌សពាក់ស្លាកលេខភ្នំពេញ 2T-6471 បើកបរក្នុងទិសដៅពីកើតទៅលិចច្រាសជិតជាមួយម៉ូតូ បន្ទាប់ពីកើតហេតុអ្នកបើកបរបានរត់គេចខ្លួនបាត់ស្រមោល បន្សល់ទុករថយន្តចោល នៅនឹងកន្លែងកើតហេតុ។
នគរបាលចរាចរខណ្ឌពោធិ៍សែនជ័យបានឲ្យដឹងថា មុនពេលកើតហេតុម៉ូតូបើកបរក្នុងល្បឿនលឿនទិសដៅ ពីលិចទៅកើត លុះដល់ចំណុចកើតក៏បានជិះឡើងវ៉ារថយន្តមួយគ្រឿងដែលនៅពីខាងមុខរបស់គេ ខណៈកំពុងតែ ឡើងវ៉ានោះក៏បានប៉ះដៃចង្កូតម៉ូតូជាមួយនឹងជញ្ជាំងរថយន្តរួចហើយខ្ទាតទៅបុកនឹងរថយន្តមួយគ្រឿងផ្សេងទៀតផ្នែកកែងរថយន្តខាងមុខមនុស្សជាប់នឹងរថយន្តអូសប្រមាណជាជាង១០ម៉ែត្រធ្លាយខួរស្លាប់ភ្លាមៗនៅនឹងកន្លែង កើតហេតុ និងម៉ូតូបានអូសនឹងជញ្ជាំងរថយន្តបុកកងក្រោយផ្ទុះទើបដួលបោកទៅនឹងថ្នល់គ្រាន់តែរងការខូចខាតបន្តិចបន្តួចនោះទេ។
នគរបាលបានបន្តទៀតថា រថយន្តដែលម៉ូតូប៉ះដៃចង្កូតដំបូងនោះគឺពុំបានឈប់នោះទេ ពុំព្រោះពុំរងការខូចខាត បានបន្តល្បឿនទៅខាងមុខបាត់ ហើយការឈានទៅមានឧប្បត្តិហេតុគ្រោះថ្នាក់ចរាចររហូតបណ្តាលឲ្យមនុស្សស្លាប់បែបនេះ គឺដោយសារអ្នកបើកបរទាំងពីរខ្វះការប្រុងប្រយ័ត្ន ម៉ូតូបើកលឿនជ្រុលរហូតដល់គំនូសទ្រូងផ្លូវរីឯ រថយន្តក៏បើកស្ទើរតែដល់គំនូសទ្រូងផ្លូវផងដែរ ដូច្នេះទាំងរថយន្តទាំងម៉ូតូបំពានច្បាប់ចរាចរទាំងអស់គ្នា។
នគរបាលបានបន្តទៀតថា សាកសពបន្ទាប់ពីធ្វើការវាស់វែងនិងធ្វើកំណត់ហេតុរួចរាល់នោះត្រូវប្រគល់ទៅឲ្យក្រុមគ្រួសារយកទៅធ្វើបុណ្យតាមប្រពៃណីនៅឯស្រុកកំណើត រីឯវត្ថុតាងទាំងពីរត្រូវប្រគល់ទៅឲ្យស្នងការដ្ឋាន នគរបាលចរាចរជើងគោករាជធានីភ្នំពេញ ដើម្បីចាត់ការទៅតាមនីតិវិធីនៃច្បាប់៕
វិទូ
Categories:
ព័តមានជាតិ