2BiC-News

រាជធានីភ្នំពេញ ៖ កុមារីអភ័ព្វម្នាក់ត្រូវបានព្រហ្មលិខិត កំណត់ឱ្យនាងជួបនូវភាពអកុសល កើតមកក្នុងត្រកូលគ្រួសារកម្មករក្រីក្រ រស់ដោយសារកម្លាំងសុទ្ធសាធ នៅក្នុងភូមិភ្នាត សង្កាត់ស្ទឹងមានជ័យ កំពុងដង្ហោយហៅរក ជំនួយសង្គ្រោះពីសប្បុរសជននានា ក៏ដូចជាអង្គការមនុស្សធម៌ដើម្បីជួយចិញ្ចឹម ដោយសារកុមាររូបនេះកើតមក គ្មានលលាដ៍ក្បាលជាហេតុធ្វើឱ្យក្បាល ចេះតែរីកលូតលាស់ធំឡើងៗ ពីមួយថ្ងៃទៅមួយថ្ងៃ ។

ជួបជាមួយអ្នកយក ព័ត៌មានកោះសន្តិភាព នៅព្រឹកថ្ងៃទី២០ កុម្ភៈ ស្ត្រីឈ្មោះប៉ុល សាវឿន ជាម្តាយកុមារីអភ័ព្វខាងលើបានរៀបរាប់ថា គាត់មានកូន៥នាក់ រាប់ទាំងកូនពៅគាត់ដែល កើតមកមានក្បាលធំចម្លែកម្នាក់នេះផង ។ ស្ត្រីដដែលបានរៀបរាប់បន្តថា ប្តីរបស់គាត់ឈ្មោះចិក សិត អាយុ២៩ឆ្នាំ មានមុខរបរជាកម្មករអូសរទេះបន្លែនៅផ្សារដើមគ និងរូបគាត់ដើរសុីឈ្នួលបោកខោអាវគេតាមផ្ទះ ក្នុងភូមិដើម្បីជួយរកប្រាក់ចិញ្ចឹមកូនទាំង៥នាក់ ។ ប៉ុន្តែជាងប្រាំពីរខែកន្លងមកនេះ ចាប់តាំងពីកូនស្រីគាត់កើតមកគឺរូបគាត់លែងធ្វើអ្វីកើតទាំងអស់ ដោយសារជាប់រវល់ មើលថែរក្សាកូន ដែលកើតមកមានក្បាលធំចម្លែក គ្រូពេទ្យប្រាប់ថា ត្រូវតែមានអ្នកមើល ថែរក្សាជាប្រចាំទើបបាន ។

ស្ត្រីឈ្មោះប៉ុល សាវឿន រៀបរាប់បន្តថា កូនស្រីគាត់ម្នាក់នេះឈ្មោះចិក សុដា អាយុ៧ខែ បច្ចប្បន្នមានទម្ងន់១១គីឡូក្រាម ដោយសារធ្ងន់ក្បាលខ្លាំង ព្រោះការរីកលូតលាស់ ឆាប់រហ័សដូចសប់ប៉េងប៉ោងអញ្ចឹង ។ ទារិកាចិក សុដា បៅច្រើនខ្លាំងណាស់ក្នុងមួយថ្ងៃៗ គឺបៅដោះម្តាយផង និងបៅទឹកដោះគោបន្ថែមទៀត ។ ដោយសារម្តាយឪពុក មិនមានលទ្ធភាពផ្តល់អាហារកូនគ្រប់គ្រាន់ ទើបដាច់ចិត្តទូរស័ព្ទមក កាន់ការិយាល័យនិពន្ធកោះសន្តិភាពឱ្យជួយចុះផ្សាយសុំជំនួយ ឧបត្ថម្ភពីសប្បុរសជននានានៅគ្រប់ទីកន្លែង មេត្តាជួយសង្គ្រោះដល់ទារិកាអភ័ព្វខាងលើនេះផង ។

ស្ត្រីឈ្មោះប៉ុល សាវឿនរៀបរាប់បន្តថា ចាប់តាំងពីថ្ងៃដែលគាត់កើតកូនស្រីចម្លែកខាងលើនេះ គឺកើតនៅមន្ទីរពេទ្យមិត្តភាពខ្មែរ-សូវៀត ប៉ុន្តែពេលកើតនោះគឺកើតមិនរួចឡើយ ទាល់តែគ្រូពេទ្យវះ ។ ចាប់តាំងពីថ្ងៃដែលកុមារីឈ្មោះចិក សុដា កើតមកដល់សព្វថ្ងៃ គឺស្ត្រីជាម្តាយបានយក កូនស្រីទៅសង្គ្រោះនៅមន្ទីរពេទ្យគន្ធបុប្ផាពីរដងរួចមកហើយ តែគ្រូពេទ្យគ្មានលទ្ធភាពព្យាបាលជំងឺរីកលូតលាស់ ធំរហ័សលើក្បាលកុមារតូចនេះបានទេ ដោយសារក្បាលគ្មានលលាដ៏ ។ ដូច្នេះមានតែទុកឱ្យកុមាររូបនេះរស់តាមយថាកម្មតែប៉ុណ្ណោះ ។

ទោះបីជាវាសនាកុមារីអភ័ព្វនេះ ទៅជាយ៉ាងណាក៏ដោយ ក៏ឪពុកម្តាយ និងសម្បុរសជននានា ដែលបានឃើញកែវភ្នែកដ៏មុតថ្លា របស់កុមារីតូចនោះ ហើយមុខជាចិត្តមិនដាច់គួរតែចូលរួម ជួយសង្គ្រោះគ្នាតាមលទ្ធភាពជាក់ស្តែង ព្រោះជីវិតមនុស្សគ្រប់រូបកើត មកគ្មាននរណាចង់ជួបវាសនាបែបនេះឡើយ ។ សប្បុរសជនជាច្រើន ដែលធ្លាប់បានចូលរួមបរិច្ចាក ថវិកាជួយដល់ទុរគតជនទាំងឡាយនាពេលកន្លងមក តាមរយៈកោះសន្តិភាពសូមមេត្តាចូលរួមសង្គ្រោះ ក្មេងស្រីអភ័ព្វខាងលើនេះផង៕