យោងតាមគេហទំព័ររ៉យទ័រចេញផ្សាយយប់ថ្ងៃទី១៩ខែកុម្ភៈ បានឲ្យដឹងថា យន្តហោះកម្លាំងអាកាសយេមែនមួយគ្រឿងបានធ្លាក់នៅក្នុងរដ្ឋធានីសាណានៅថ្ងៃអង្គារ ទី១៩ ខែកុម្ភៈ ដោយបានសម្លាប់មនុស្សយ៉ាងហោចណាស់១២នាក់។
ទីភ្នាក់ងារព័ត៌មានរដ្ឋសាបា បាននិយាយថា ស្ត្រី៣នាក់ និងកុមារ២នាក់ស្ថិតក្នុងចំណោមអ្នកដែលបានស្លាប់នៅពេលយន្តហោះធ្លាក់ ភាគខាងលិច សង្កាត់របស់អ្នកស្រុក ក្នុងពេលហោះហើរបណ្ដុះបណ្ដាល ហើយមនុស្ស១១នាក់បានរងរបួស។
រូបភាពនៃការធ្លាក់នៅលើប្រព័ន្ធផ្សព្វផ្សាយសង្គមបានបង្ហាញសាកសពម្នាក់នៅជិតកម្ទេចកំទីយន្តហោះ។ រថយន្ត៣-៤គ្រឿងបានឆេះ និងកម្ទេចកំទីពង្រាយតាមផ្លូវ។
មន្ត្រីសន្តិសុខម្នាក់បាននិយាយថា អ្នកបើកបរយន្តហោះ ខ្ទាតចេញពីយន្តហោះ។ មិនទាន់មានដំណឹងភ្លាមៗថាតើគាត់រស់រានមានជីវិតឬយ៉ាងណានោះទេ។
អ្នកស្រុកម្នាក់ឈ្មោះ Abdullah al-Ashwal បាននិយាយថា «វារន្ធត់និងឈឺចាប់»។ «ប៉ូលិស និងគ្រូពេទ្យបានជម្លៀសសាកសព៥នាក់ដែលបានឆេះរួចជាស្រេច ដោយសពពួកគេទាំងអស់មើលមិនយល់នោះទេ។
Abdulsattar Mohammedបាននិយាយថា គាត់បានឃើញយន្តហោះកំពុងឆេះនៅជិតផ្ទះដែលឆេះផងដែរ។ «មនុស្សតក់ស្លុតយ៉ាងខ្លាំង ហើយរថយន្តសង្គ្រោះបានមកដល់ជាក្រោយ»។ មន្ត្រីយោធាម្នាក់និយាយថា យន្តហោះនោះជាប្រភេទយន្តហោះចម្បាំង Russian SU-22។
យោងតាមសៀវភៅតុល្យភាពយោធាឆ្នាំ២០១២(2012 Military Balance )ចេញដោយវិទ្យាស្ថានអន្តរជាតិ នៃការសិក្សាយុទ្ធសាស្ត្រ (International Institute of Strategic Studies )បានឲ្យដឹងថា ប្រទេសយេមែនមានយន្តហោះSU-22ចំនួន៣០ និង យន្តហោះSU-22UM3 ៤គ្រឿងនៅក្នុងកម្លាំងអាកាសជាមួយយន្តហោះដែលមានសមត្ថភាពចំនួន៧៩នៅក្នុងចំណោមយន្តហោះទាំងអស់។
នៅក្នុងខែវិច្ឆិកា ឆ្នាំ២០១២ យន្តហោះដឹកជញ្ជូនយោធាយេមួយគ្រឿងបានធ្លាក់នៅជិតអាកាសយានដ្ឋានសាណា និង បានឆេះជាអណ្ដាតភ្លើង។
ប្រភពខាងលើមិនទាន់បានបញ្ជាក់នូវមូលហេតុដែលបណ្ដាលឲ្យយន្តហោះនោះធ្លាក់និងចំនួនមនុស្សសរុបនៅលើយន្តហោះនោះនៅឡើយទេ ប៉ុន្តែបើយោងតាមទីភ្នាក់ងារព័ត៌មានសួនហ៊ូបានឲ្យដឹងថាការធ្លាក់នោះបណ្ដាលមកពីបញ្ហាបច្ចេកទេស ហើយប្រធានាធិបតីបានបញ្ជាឲ្យធ្វើការស៊ើបអង្កេតចំបញ្ហានេះផងដែរ៕
Categories:
ព័តមានអន្តរជាតិ