ប៉ោយប៉ែត៖ បុរសម្នាក់បានរងនូវគ្រាប់កាំភ្លើងធ្លាយពោះត្រូវដឹកទៅសង្គ្រោះនៅមន្ទីរពេទ្យ ដោយមិនបានដឹងពីមូលហេតុពិតប្រាកដនៃការផ្ទុះអាវុធនោះទេ។
បើតាមការរៀបរាប់ពីប្រពន្ធជនរងគ្រោះឲ្យដឹងថា ករណីផ្ទុះអាវុធនេះកើតឡើងកាលពីវេលាម៉ោង៤និង៣០នាទីល្ងាចថ្ងៃទី១៥ ខែកុម្ភៈឆ្នាំ២០១៣ នៅចំណុចខាងជើងសាលាសង្កាត់ប៉ោយប៉ែត ក្នុងភូមិ មិត្តភាព សង្កាត់-ក្រុងប៉ោយប៉ែត ខេត្តបន្ទាយមានជ័យ។
បុរសរងគ្រោះមានឈ្មោះ មេង ទ្រី អាយុ៤៤ឆ្នាំមានកូន៥នាក់ និងមានប្រពន្ធឈ្មោះ អល់ សុវណ្ណ អាយុ២៧ឆ្នាំ រស់នៅភូមិកើតហេតុខាងលើនេះបានរងរបួសធ្ងន់ធ្ងរដោយគ្រាប់កាំភ្លើងខ្លីត្រូវចំពោះខាងស្ដាំធ្លាយទៅឆ្អឹងខ្នង ហើយត្រូវដឹកទៅសង្គ្រោះនៅមន្ទីរពេទ្យបង្អែកកម្ពុជា-ជប៉ុនស្រុកមង្គលបុរី។
ប្រពន្ធជនរងគ្រោះឲ្យដឹងថា បើតាមអ្នកជិតខាងដែលបានឃើញហេតុការណ៍ផ្ទុះអាវុធនោះបានប្រាប់គាត់ថា ប្ដីរបស់គាត់នៅពេលកើតហេតុកំពុងឈរបាញ់ទឹកនៅលើដងផ្លូវកុំឲ្យហុយខ្លាំងពេក ស្រាប់តែភ្លាមនោះគេឃើញមានរថយន្តមួយគ្រឿងម៉ាកវីហ្គោពណ៌ទឹកប្រាក់ បើកមកចតខាងមុខជនរងគ្រោះរួចមានមនុស្ស៤នាក់បានចុះតម្រង់មករកប្ដីគាត់ហើយក៏លាន់ឮស្នូរផ្ទុះអាវុធតែម្ដង។ ចំពោះករណីដែលបណ្ដាលឲ្យផ្ទុះអាវុធត្រូវជនរងគ្រោះ មិនទាន់ដឹងពីមូលហេតុពិតប្រាកដនៅឡើយទេ៕
Categories:
ព័តមានជាតិ