ភ្នំពេញ
៖
បុរសអ្នកជិះម៉ូតូសង់កូរ៉េម្នាក់បានទទួលរងរបួសយ៉ាងធ្ងន់ធ្ងរ
ដោយសាររថយន្តឡង់គ្រីស័របើកបរដោយមន្ត្រីយោធាម្នាក់ក្នុងស្ថានភាព
ស្រវឹងស្រាជោកជាំបានបើកបុកទាំងកម្រោល
ខណៈពេលធ្វើដំណើរបញ្ច្រាសទិសគ្នា
ហើយក្រោយពីកើតហេតុរថយន្តបង្កបានព្យាយាមបើករត់
តែព្រះមិនជួយត្រូវសមត្ថកិច្ចមូលដ្ឋានសហការជាមួយនគរបាលព្រហ្មទណ្ឌ
ខណ្ឌដង្កោ ដេញតាមឃាត់ជាប់នៅចំណុចរង្វង់មូលដីក្រហម។
សមត្ថកិច្ច
ប្រាប់ថា ហេតុការណ៍គ្រោះថ្នាក់ចរាចរនេះបានកើតឡើងកាលពីវេលាម៉ោង១៨
នឹង ៣៥ នាទីយប់ថ្ងៃទី ២៦ ខែកុម្ភៈ ឆ្នាំ ២០១៣
នៅចំណុចក្បែរមណ្ឌលសុខភាពចំការដូង តាមបណ្តោយផ្លូវ២១៧
ស្ថិតក្នុងសង្កាត់ដង្កោ ខណ្ឌដង្កោ រាជធានីភ្នំពេញ។
មន្ត្រី
នគរបាលព្រហ្មទណ្ឌខណ្ឌដង្កោប្រាប់ឲ្យដឹងថា
អ្នកបើកបររថយន្តឡង់គ្រីស័រមានឈ្មោះ ទេព សារី ភេទប្រុស អាយុ ៥២ឆ្នាំ
មុខរបរជាយោធា រស់នៅសង្កាត់រលួស ខណ្ឌដង្កោ
ដោយឡែកជនរងគ្រោះជាម្ចាស់ម៉ូតូសង់កូរ៉េ ឈ្មោះ ជួន តុន ភេទប្រុស អាយុ
៣៦ ឆ្នាំ មានទីលំនៅសង្កាត់ដង្កោ ខណ្ឌដង្កោ។
សាក្សី
នៅកន្លែងកើតហេតុប្រាប់ឲ្យកម្ពុជាថ្មីដឹងថា
មុនពេលកើតហេតុពួកគាត់បានឃើញជនរងគ្រោះជិះម៉ូតូសងកូរ៉េ ពណ៌ក្រហម
តែម្នាក់ឯងធ្វើដំណើរតាមបណ្តោយផ្លូវ២១៧ទិសដៅពីត្បូងទៅជើង
លុះជិះមកដល់ចំណុចកើតហេតុខាងលើស្រាប់មានរថយន្តឡង់គ្រីស័រ ពណ៌ស
ពាក់ស្លាកលេខ កណ្តាល 2A -6048 បើកបរ
បញ្ច្រាសទិសគ្នាពីជើងទៅត្បូង
អ្នកបើករថយន្តមានស្ថានភាពស្រវឹងស្រាជោគ
មិនដឹងជាយ៉ាងម៉េចស្រាប់តែរេចង្កូតមកឆ្វេងដៃចូលទៅចំណីផ្លូវម្ខាង
ទៀតស្ទុះទៅបុកម៉ូតូពេញទំហឹង រួចអូសម៉ូតូជាង ២០ ម៉ែត្រ
បណ្តាលឲ្យអ្នកបើកម៉ូតូដួលបោកក្បាលរងរបួសធ្ងន់ធ្ងរ
ត្រូវបានដឹកបញ្ជូនទៅសង្គ្រោះនៅមន្ទីរពេទ្យ។
សាក្សី
បញ្ជាក់ប្រាប់ថា
ក្រោយពីកើតហេតុរថយន្តឡង់គ្រីស័របង្កបានព្យាយាមបន្ថែមល្បឿនបើក
រត់ឆ្ពោះទៅទិសខាងត្បូង ដើម្បីគេចវេសពីហេតុការណ៍
តែអំពើអាក្រក់ព្រះមិនតាមជួយនោះទេ ត្រូវនគរបាលព្រហ្មទណ្ឌខណ្ឌដង្កោ
សហការជាមួយនគរបាលមូលដ្ឋានដេញចាប់រថយន្តបង្កហេតុ
រហូតដល់ចំណុចរង្វង់ដីក្រហម សង្កាត់រលួស ទើបឃាត់រថយន្តបាន។
ប្រភព
ព័ត៌មានដដែលប្រាប់បន្តថា ក្រោយពីឃាត់រថយន្តនិងអ្នកបើកបរបាន
សមត្ថកិច្ចក៏បាននាំមករក្សាទុកនៅអធិការដ្ឋាននគរបាលខណ្ឌដង្កោដើម្បី
ដោះស្រាយតាមច្បាប់៕
Categories:
ព័តមានជាតិ