2BiC-News

រាជធានីភ្នំពេញ ៖ នារីម្នាក់ដើរឆ្លងផ្លូវ ត្រូវម៉ូតូវីវ៉ាកញ្ចាស់នៅសល់តែគ្រោងឆ្អឹង ជិះទៅបុក បណ្តាលឱ្យដួលរងរបួសធ្ងន់ ចំណែកម៉ូតូមិនបានដួលធ្វើឱ្យអ្នកជិះរងរបួសទេ ។ គ្រោះថ្នាក់នេះ កើតឡើងកាលពីវេលាម៉ោង ៦និង៥០នាទីយប់ ថ្ងៃទី១៦ កុម្ភៈ ២០១៣ នៅចំណុចផ្លូវលេខ ២១៧ កែងមហាវិថីព្រះមុនីវង្ស ត្រង់ស្តុបហ្សាដឺហ្គោ ក្នុងសង្កាត់ផ្សារថ្មីទី២ ខណ្ឌដូនពេញ ។

ប្រភពព័ត៌មានបានឱ្យដឹងថា ម៉ូតូវីវ៉ាកញ្ចាស់នៅសល់តែតួម៉ូតូ ពណ៌ខ្មៅ ជិះគ្នា២នាក់ ស្រីម្នាក់ ប្រុសម្នាក់ តាមផ្លូវលេខ២១៧ ពីកើតទៅលិចក្នុងល្បឿនលឿនពេកទៅបុកនារីវ័យក្មេងម្នាក់ដើរឆ្លងផ្លូតាមមហាវិថីព្រះមុនីវង្ស ពីជើងទៅត្បូង បណ្តាលឱ្យដួលសន្លប់ឈឹង រីឯម៉ូតូវីវ៉ានោះមិនបានដួលធ្វើឱ្យអ្នកជិះរងរបួសទេ។

នារីរងគ្រោះមានឈ្មោះគឹម ហួយ អាយុ១៦ឆ្នាំ ស្នាក់នៅសង្កាត់ផ្សារអូរឫស្សីទី៣ ខណ្ឌ៧មករា រងរបួសធ្ងន់ បញ្ជូនទៅព្យាបាលនៅមន្ទីរពេទ្យកាល់ម៉ែត ។ ចំណែកអ្នកបើកម៉ូតូបង្កមានឈ្មោះប៉ិច កក់ ភេទប្រុស អាយុ១៩ឆ្នាំ មុខរបរកម្មករដឹកគ្រឿងសមុទ្រនៅផ្សារថ្មី ស្នាក់នៅម្តុំផ្សារថ្មី ៕

បញ្ចូលអត្ថបទ ៖ បុប្ផា កោះ

ផ្តល់សិទ្ធដោយ កោះសន្តិភាព