បាត់ដំបង ៖ វត្ថុតាងគ្រឿងញៀនចំនួន៥ថង់តូចទម្ងន់៣,៥៥ក្រាម (ហៅម៉ាទឹកកក) និងគ្រឿងញៀនប្រភេទយ៉ាម៉ា(WY)ចំនួន១៤គ្រាប់ទាំងពីមុខនេះជាសារធាតុថ្នាំញៀនមេតមហ្វេតាមីនចាប់បានរួមនិងជនសង្ស័យ ប្រុស ស្រី ២នាក់ ដែលពួកគេចែកចាយថ្នាំញៀន នៅក្បែរសកលវិទ្យាល័យគ្រប់គ្រងនិងសេដ្ឋកិច្ច (U.M.E) ស្ថិតក្នុងភូមិព្រែកព្រះស្ដេច សង្កាត់ព្រែកព្រះស្ដេច ក្រុងបាត់ដំបង។
លោកអនុសេនីយ៍ទោ សុខ និមល មន្ត្រីការិយាល័យប្រឆាំងគ្រឿងញៀនបានឲ្យដឹងថា ជនសង្ស័យទី១ មានឈ្មោះ ស្រី លាងផេង ភេទប្រុស អាយុ២៩ឆ្នាំ មានទីលំនៅភូមិរំចេក៤ សង្កាត់រតនៈ និងទី២ មានឈ្មោះ ម៉ៅ សុខធី ភេទស្រី អាយុ២៤ឆ្នាំ រស់នៅផ្ទះជួលភូមិរំចេក៤ សង្កាត់រតនៈ ក្រុងបាត់ដំបង ត្រូវបានចាប់ខ្លួនកាលពីថ្ងៃទី១៦ ខែមីនា ឆ្នាំ២០១៣ វេលាម៉ោង១៧និង៣០នាទីល្ងាច ក្នុងភូមិសង្កាត់ខាងលើ។
លោកបន្តថា ពួកគេទាំង២នាក់ជាមុខសញ្ញាចែកចាយគ្រឿងញៀន ដែលមានវិក្កយបត្រវេរលុយ និងវេរថ្នាំញៀនយ៉ាងសកម្មហើយនៅក្បែរសកលវិទ្យាល័យទៀត។ ពេលនេះជនសង្ស័យ និងវត្ថុតាងគ្រឿងញៀន ជំនាញកំពុងកសាងសំណុំរឿងបញ្ជូនទៅតុលាការដើម្បីចាត់ការតាមនីតិវិធី។
ជនសង្ស័យសារភាពថា ពួកខ្លួនបានទិញថ្នាំញៀននេះ មកពីភ្នំពេញ ទើបនិងយកមកលក់ម្ដងនេះ ត្រូវសមត្ថកិច្ចចាប់ខ្លួនតែម្ដង ដែលក្នុង១កញ្ចប់ទិញចូល១០ដុល្លារ លក់ចេញវិញបាន១៥ដុល្លារ ចំណែកថ្នាំញៀនយ៉ាម៉ាទិញចូល១គ្រាប់១ម៉ឺនរៀល លក់ចេញវិញបាន១ម៉ឺន៥ពាន់រៀល៕
ណារីន
Categories:
ព័តមានជាតិ