តាកែវ ៖ ជនសង្ស័យដើរលួចម៉ូតូយ៉ាងសកម្ម២នាក់ត្រូវបានកម្លាំងកងរាជអាវុធហត្ថខេត្តក្របួចបាន តាមពាក្យបណ្ដឹងរបស់ជនរងគ្រោះនាពេលថ្មីៗនេះ។
លោក ចាន់ ជៀប នាយការិយាល័យស្រាវជ្រាវបទល្មើសព្រហ្មទណ្ឌបញ្ជាការដ្ឋានកងរាជអាវុធហត្ថខេត្តតាកែវបានឲ្យដឹងថា ជនសង្ស័យ២នាក់ត្រូវបានឃាត់ខ្លួននោះទី១. ឈ្មោះ វិន ថាវិត ភេទប្រុស អាយុ២០ឆ្នាំ រស់នៅភូមិឡូរី-សង្កាត់រកាក្នុង ស្រុកដូនកែវ ខេត្តតាកែវ ទី២. ឈ្មោះ សែន ចន្នី ភេទប្រុស អាយុ២៤ឆ្នាំ រស់នៅភូមិគោកញ ឃុំព្រៃស្លឹក ស្រុកទ្រាំង ខេត្តតាកែវ ហើយ ជនសង្ស័យរូបនេះទើបចេញពីពន្ធនាគារបានប្រហែល១ឆ្នាំប៉ុណ្ណោះ ក៏ប្រព្រឹត្តិបទល្មើសបន្តទៀត។
ជនរងគ្រោះឈ្មោះ ពេជ្រ សុវណ្ណ ភេទប្រុស អាយុ៣៤ឆ្នាំ រស់នៅភូមិព្រៃនប់ ឃុំស្រង៉ែ ស្រុកទ្រាំង ខេត្តតាកែវបាននិយាយថា មុនពេលកើតហេតុខ្លួនបានវិលត្រឡប់មកពីបុណ្យបងប្អូន លុះដល់ចំណុចមុខសាលាបង្រៀនភាសាកូរ៉េ ខ្លួនមានសភាពស្រវឹងស្រា ហើយងងុយដេកផងក៏បានបញ្ឈប់ម៉ូតូនៅក្បែរកន្លែងដេក ក្រោយមកជនសង្ស័យខាងលើក៏បានលួចយកម៉ូតូរបស់ខ្លួនម៉ាកសេ៧០គុបជ្រុងពណ៌បៃតងពាក់ស្លាកលេខភ្នំពេញ 1H-8452 ទៅបាត់។ លុះនៅថ្ងៃទី១៤ ខែមីនា ឆ្នាំ២០១៣ វេលាម៉ោង១និង៣០នាទី អាវុធហត្ថបានចាប់ខ្លួនជនសង្ស័យដែលធ្វើសកម្មភាពលួចម៉ូតូនោះ តែម៉ូតូត្រូវជនសង្ស័យជិះយកទៅលក់នៅភ្នំពេញក្នុងតម្លៃ២០០ដុល្លារបាត់ទៅហើយ។
ហេតុការណ៍នេះបានកើតឡើងកាលពីវេលាម៉ោង១និង៣០នាទីថ្ងៃទី១៣ ខែមីនា ឆ្នាំ២០១៣ នៅចំណុចមុខសាលាបង្រៀនភាសាកូរ៉េ។ ជនសង្ស័យទាំង២នាក់ខាងលើកងរាជអាវុធហត្ថបានបំពេញសំណុំរឿងបញ្ជូនទៅតុលាការខេត្តចាត់ការបន្តតាមផ្លូវច្បាប់៕
Categories:
ព័តមានជាតិ